Taageero loo goobayo "guul dhameystiran" oo ka dhan ah Al-Shabaab

Madaxwayne Xasan Sheekh Maxamuud ayaa safar xambaarsan qorshahan wuxuu ku gaarey Talyaaniga.

ROMA, Talyaaniga - Madaxweyne Xasan Sheekh Maxamuud ayaa gaaray magaalada Roma ee dalka Talyaaniga oo ay uga bilaabatay booqasho rasmi ah oo ku saabsan "xoojinta xiriirka faca-weyn ee dalkeennu uu la leeyahy Talyaaniga".

Sida ay sheegtay Villa Soomaaliya, Xasan Sheekh oo marti-qaad ka helay madaxda dalkaas ayaa kulammo la qaadan doona dhiggiisa Sergio Mattarella iyo Ra’iisul Wasaare Giorgia Meloni.

Wadahadaladda ayaa, sidda ku xusan bayaanka, waxaa xoogga lagu saarayaa "kobcinta iskaashiga labada dal, xaaladda gobolka iyo hirgelinta heshiisyadii ay horey u galeen Soomaaliya iyo Talyaaniga".

"Madaxweyne Xasan Sheekh Maxamuud oo xambaarsan qorshaha qaran ee dabar-goynta argagixisada Alshabaab ayaa Madaxda Talyaaniga u soo bandhigaya dhinacyada ay danaynayso dowladda Federaalka Soomaaliya in laga caawiyo, si guul dhammeystiran looga gaaro dagaalkan, loona gaarsiiyo shacabka Soomaaliyeed xasilloonida iyo nabadda ay naawilayaan," ayay raacisay.

Hogaamiyeyaasha ayaa sidoo kale waxaa la rajeynayaa in ay kawada xaajoodaan qodobo taabanaya arrimaha horumarka gaar ahaan maalgashiga iyo dardargelinta mashaariicda kaabayaasha dhaqaalaha.

"Sidoo kale, Labada dal ayaa ka arrinsanaya iskaashiga dhinacyada maalgashiga, dhaqaalaha, Warshadaha iyo waxbarashada, iyadoo Madaxda iyo diblumaasiyiinta ku wehelinaya safarkan Madaxweynaha Jamhuuriyadda ay la saxiixan doonaan dhiggooda dalka Talyaaniga heshiisyo iyo is-afgarad ku qotoma danaha dalkeeinna," ayay kusoo gabagabeysay Madaxtooyadda.

Talyaaniga ayaa kamid ah wadamadda ka taageera dalka Soomaaliya arrimaha ammaanka, dowlad dhiska iyo la dagaalanka Al-Shabaab wallow kaalintiisa aysan si weyn uga dhex-muuqan fagaareyaasha caalamka dhowrkii sano ee lasoo dhaafay.

GAROWE ONLINE