Wasiirka Isgaarsiinta oo doonayo in la dhaqan geliyo go’aankiisa
-
GAROWE ONLINE XAFIISKA MUQDISHO
- Posted On 24-08-2023, 12:49PM
MUQDISHO, Soomaaliya - Golaha Wasiirada ayaa maanta yeeshay kulan uu shir guddoominayay Ra’iisul Wasaare Ku Xigeenka Saalax Axmed Jaamac.
Kulankan ayaa ku soo beegmay maalinta ay u qorsheesay Wasaarada Isgaarsiinta iyo Tignoolajiyada in xayiraad la saaro aaladaha TikTok, Telegram, iyo 1XBET.
Wararka qaar ayaa sheegaya in Wasiirka Isgaarsiinta iyo Tignoolajiyada Jaamac Xasan Khaliif uu ka dalbaday Golaha in ay taageeraan go’aankiisa, halka goluhuna uu wasiirku kula taliyey in uu kulamo la qaato culimada, dhalinyarada iyo qeybaha kale ee bulshada.
Sidoo kale golaha ayaa soo jeediyay in wasiirku oo hor istaago guddiga warfaafinta iyo isgaarsiinta ee Golaha Shacabka 27-kii bishan oo sharraxaad ka bixiyo sababaha keenay go’aankan.
Wararka qaar ayaa sheegaya in Golaha Wasiirada ay diideen go’aan aan lagala tashan hey’adaha ay khuseyso, isla markaana aan si wada jir ah loo qaadan.
Balse wasiirka ayaa isku dayaya inuu ku adkeysto fulinta go’aanadiisa, isagoo xiriiro la sameeyay mas’uuliyiin ka tirsan madaxa dalka.
GAROWE ONLINE
