Xasan Sheekh oo gaaray degmada Xudur
-
GAROWE ONLINE XAFIISKA MUQDISHO
- Posted On 19-10-2023, 12:38PM
XUDUR - Madaxweynaha Jamhuuriyadda Federaalka Soomaaliya Xasan Sheekh Maxamuud ayaa gaaray degmada Xudur ee Xarunta Gobolka Bakool, halkaas oo ay si heer sare leh ugu soo dhaweeyeen qeybaha kala duwan ee bulshada.
Madaxweynaha ayaa safarkiisa ku wehlinaayey Guddoomiyaha Golaha Shacabka Baarlamaanka Federaalka Sheekh Aadan Maxamed Nuur iyo Madaxweynaha Dowlad-goboleedka Koonfur-galbeed Cabdicasiis Xasan Maxamed
Safarka Madaxweyne Xasan Sheekh ayaa ku saleysan dardar gelinta qorshaha wajiga 2-aad ee howlgallada dalka looga xoreynayo kooxda Al-shabaab oo dhawaan ka bilaaban doona deegaannada ay go'doomiyeen ee Dowlad-goboleedka Koonfur-galbeed.
Madaxweyne Xasan Sheekh iyo Madaxda wehelisay ayaa kulammo la qaadanaya waxgaradka, dhallinyarada iyo guud ahaan bulshada degmada Xudur, si ay u dhageystaan baahiyahooda.
GAROWE ONLINE
