Xasan Sheekh oo lasoo gaarsiiyey fariin uga timid dhigiisa Burundi

Wasiirka Arrimaha Dibadda dalka Burundi, Albert Shingiro, ayaa booqasho ku yimid caasimada Muqdisho.

MUQDISHO, Soomaaliya - Madaxweyne Xasan Sheekh Maxamuud ayaa Madaxtooyada Qaranka kulan kula qaatay Wasiirka Arrimaha Dibadda dalka Burundi Mudane Albert Shingiro oo booqasho ku jooga dalkeenna.

Wasiirka ayaa, sidda ay shaaca ka dhigtey Villa Soomaaliya, waxa uu Xasan Sheekh soo gaarsiiyey farriin iyo salaan uu ka siday Madaxweynaha dalkiisa Évariste Ndayishimiye.

"Dowladda Burundi ayaa hoosta ka xariiqday muhiimadda nabadda iyo xasilloonida Soomaaliya ay u leedahay Gobolka iyo Adduunka," ayaa la raaciyey war-saxaafadeedka Madaxtooyadda.

Sidoo kale, wasiirka ayaa sheegay "in dalkiisu ay bogaadinayaan guulaha degdegga ah ee dowladda Soomaaliyeed ay ka gaartay dagaalka lagula jiro argagixisada Al-Shabaab, isagoo sheegay in dalkiisu ay garab taagan yihiin shacabka iyo dowladda Soomaaliyeed".

Dhankiisa, Xasan Sheekh ayaa "kala hadlay wasiirka xoojinta xiriirka Labada dal, waxa uuna xusay in shacabka iyo dowladda Soomaaliyeed ay soo dhawaynayaan booqashadiisa, taas oo ka tarjumeysa hor u socodka dowladnimada Soomaaliyeed iyo dib u kabashada dalka".

GAROWE ONLINE