Xasan Sheekh oo Uganda tababar ugu soo xiraya ciidamo Soomaali ah

Kampala ayaa kamid ah wadamadda askarta ku taakuleeyay howlgalka ku meelgaarka ah Midowga Afrika ee ATMIS.

MUQDISHO, Soomaaliya - Madaxweyne Xasan Sheekh Maxamuud ayaa gaaray caawa magaaladda Kambaala ee dalkan Uganda, halkaas oo uu tababar ugu soo xirayo cutubyo ka tirsan Ciidamada Qalabka Sida ee Soomaaliyeed.

Xasan Sheekh oo lagu soo dhaweeyey garoonka caalimaga ah ee Entebbe International Airport ayaa uga mahadceliyey dowladda iyo shacabka Uganda doorka ay ka qaadanayaan dib u dhiska Ciidamada Soomaaliyeed oo si naf hurnimo leh u wajahaya dagaalka ka dhanka ah argagixisada Alshabaab, dhiiggoodana u huraya xoreynta dalkooda iyo xasilloonida gobolka.

"Madaxweynaha Jamhuuriyadda ayaa dul istaagi doona tayada tababarrada ay qaateen guutooyinkan ka tirsan Ciidamada Xoogga Dalka, isagoo la wadaagaya guulaha la taaban karo ee Ciidamadeennu ay ka soo hooyeen howlgallada dalka looga xoreynayo argagixisada Al-Shabaab," ayaa lagu yiri qoraal kasoo baxay Villa Soomaaliya.

Qoraalka ayaa la raaciyey: "Madaxweyne Xasan Sheekh Maxamuud ayaa adkeeyey muhiimadda ay leedahay dib u habaynta Ciidanka Qalabka Sida oo aas-aas u ah dowladnimada dalkeenna iyo in guul deg-deg ah laga gaaro dagaalka dalka lagaga sifaynayo argagixisada".

GAROWE ONLINE