Xisbiyada mucaaradka oo ka digay xeer loo gudbiyey Golaha Wasiirada

MUQDISHO, Soomaaliya – Madasha Xisbiyadda Qaran ayaa waxay ka digtay xeer ay sheegeen in maanta oo Khamiis ah looga doodi doono shirka todobaadlaha ah ee Golaha Wasiiradda Soomaaliya.

Sharciga hay'addaha aan dowliga ahayn ayaa waxaa diyaarisay Wasaaradda Qorsheynta xukuumadda federaalka ah.

Sidda laga soo xigtay qoraal kasoo baxay Madasha, oo ay ku midoobeen lix xisbi siyaasadeed, ujeedka uu wasiir Jamaal Maxamed Xasan ka leeyahay xeerkan waa "in uu awood badan yeesho".

"Macnaha ugu weyn ee ku duugan xeerkan waa in ay Wasiirka u suura-gasho go’aan ka gaarista meesha iyo sifaha hay’adaha deeqaha bixiya u qeybinayaan kaalmooyinka dibadda ka yimaada".

Xeerka ayaa caqabad ku noqon doona wada-hadalka iyo heshiisyadii lala galay Somaliland, sidda ku xusan bayaanka.

"Ujeedada heshiisyadda laga lahaa waxay ahayd in la abuuro jawi sahli kara wada-hadal macno leh oo dhex mara Xukuumadda Dhexe iyo Somaliland si looga midho-dhaliyo midnimo la isla ogolyahay".

Wasiir Jamaal ayaa horey u waydiistay Beesha Caalamka in dhaqaalaha laga joojiyo Somaliland isla markaana xukuumaddiisa lasoo marsiiyo mashaariicda ku wajahan degaanada maamulkaas.

Ugu dambeyntii, xisbiyadda oo si cad u muujiyey in ay kasoo horjeedaan xeerkan ayaa soo jeediyey "in aan goleyaasha la horkeenin xeerarka noocaan ah inta laga gaarayo xal u cuntami kara umadda".

QORAALKA WASIIRKA

GAROWE ONLINE