Wareysi Washington ka dhacay oo dhaliyey dhaliilo loo jeediyey Madaxweyne Cirro

Madaxweynaha Somaliland, Cabdiraxmaan Cabdillaahi Maxamed, oo ku sugan Madaxtooyada Hargeysa, Somaliland, 14-kii Juun 2026. (Xafiiska Madaxweynaha Somaliland/AFP)

WASHINGTON — Madaxweynaha Somaliland Cabdiraxmaan Maxamed Cabdillaahi “Cirro” ayaa wajahaya dhaliilo ka dhashay wareysi uu ka qaybgalay intii uu ku sugnaa Washington, kaddib markii jawaabihii uu ka bixiyey su’aalo ku saabsan macdanta, dagaalka Suudaan iyo muhiimadda istaraatiijiga ah ee Somaliland ay hadal-heyn ka abuureen baraha bulshada iyo qaar ka mid ah falanqeeyayaasha arrimaha Afrika.

Cirro ayaa 14-kii Sebtembar ka hadlay Hudson Institute, oo ah xarun cilmi-baaris oo fadhigeedu yahay Washington. Kulanka, oo cinwaankiisu ahaa Somaliland as a "Strategic Partner"in the Horn of Africa", ayaa qayb ka ahaa dadaalka Somaliland ay ku doonayso inay xiriir dhow la yeelato Washington isla markaana ay taageero ugu hesho aqoonsi caalami ah.

Booqashada ayaa ku soo beegantay xilli Somaliland ay Mareykanka u bandhigayso iskaashi dhinacyada dekedaha, macdanta, ganacsiga iyo amniga ah. Wareysi kale oo uu Cirro siiyey Semafor ayuu ku sheegay in Somaliland ay diyaar u tahay inay soo bandhigto “xarumaheeda iyo macdanteeda”, isaga oo tilmaamay in iskaashigu ku dhisnaado dano labada dhinac ah.

Hase yeeshee, doodda Hudson ayaa yeelatay jihada ka duwan farriintaas.

Markii la weydiiyey noocyada macdanta muhiimka ah ee Somaliland ay Mareykanka siin karto fursad uu ku maalgeliyo, Cirro wuxuu sheegay inuusan ahayn khabiir cilmiga dhulka ah, isaga oo qosol ku daray jawaabtiisa. Jawaabtaas ayaa dhalisay su’aalo ku saabsan sida wafdigu ugu diyaarsanaa inuu si faahfaahsan u soo bandhigo kheyraadka uu Somaliland ku doonayo inuu ku soo jiito Washington.

Su’aal kale ayaa ka timid dagaalka Suudaan iyo sida Somaliland u aragto colaaddaas oo ay ku lug leeyihiin quwado badan oo gobolka ah. Cirro wuxuu Suudaan ku tilmaamay meel ka fog Somaliland, isaga oo masaafada u barbar dhigay Venezuela. Joshua Meservey oo wareysiga waday ayaa jawaabta ka daba yimid isagoo xusay in Suudaan aysan sidaas uga fogeyn Somaliland, ka hor inta aan doodda loo gudbin mowduuc kale.

Qaybahaas wareysiga ayaa si weyn loogu faafiyey baraha bulshada.

Cameron Hudson, oo hore uga tirsanaa hay’adaha dowladda Mareykanka isla markaana ka faallooda arrimaha Afrika, ayaa si adag u dhaliilay qaabkii madaxweynaha Somaliland uga jawaabay su’aalaha, isagoo ku dooday inuusan si buuxda u gudbin farriintii istaraatiijiga ahayd ee booqashadiisa. Dhaliisha Hudson waa aragtidiisa gaarka ah, waxaana dhinaca kale jira warbaahin iyo falanqeeyayaal booqashada ku tilmaamay fursad Somaliland ay Washington ugu soo bandhigtay muhiimadda Berbera, Gacanka Cadmeed iyo amniga Badda Cas.

Su’aal kale oo muhiim ahayd ayaa ku saabsanayd sababta Mareykanku u aqoonsan lahaa Somaliland. Cirro wuxuu ku jawaabay in Somaliland “ficil ahaan” aysan qayb ka ahayn Soomaaliya, halka uu sheegay inay “aragti ahaan” weli qayb uga tahay Soomaaliya.

Somaliland waxay 1991 ku dhawaaqday inay dib ula soo noqotay madaxbannaanideeda kaddib burburkii dowladdii dhexe ee Soomaaliya. Tan iyo markaas waxay dhistay hay’ado iyo nidaam maamul u gaar ah, balse arrinta aqoonsigeedu waxay muddo dheer ahayd qodobka ugu weyn ee siyaasaddeeda dibadda.

Muhiimadda juqraafiyeed ee Somaliland ayaa sanadihii dambe sii gashay doodaha Washington, gaar ahaan dekedda Berbera iyo xeebta dheer ee Gacanka Cadmeed oo ku dhow marin-biyoodka Bab al-Mandab.

Sidaas darteed, booqashada Cirro ee Washington waxay ahayd fursad uu maamulka Somaliland ku doonayay inuu doodda aqoonsiga ku xiro danaha amni iyo dhaqaale ee Mareykanka. Hase yeeshee, hadal-heynta ka dhalatay wareysiga Hudson ayaa qayb ka mid ah dareenka ka wareejisay farriintaas istaraatiijiga ah, iyadoo dooddu hadda sidoo kale ku saabsan tahay sida madaxweynuhu uga jawaabay su’aalihii faahfaahsan ee loo soo jeediyey.

GAROWE ONLINE