El-Sisi iyo Al-Burhan oo ka wada hadlay Arrimaha Biyaha Webiga Niil iyo Xaalada Sudan

Cairo – Madaxweynaha Masar, Abdel Fattah El-Sisi, ayaa xarunta madaxtooyada Al-Ittihadiya ee Caasimadda Cairo ku qaabilay Madaxweynaha Golaha Sare ee Sudan, Taliyaha Guud Lt. Gen. Abdel Fattah Al-Burhan, iyagoo ka wada hadlay xiriirka labada dal iyo arrimaha gobolka, oo ay ku jiraan biyaha Webiga Niil iyo colaadda ka taagan Sudan.

Afhayeenka madaxtooyada, Safiirka Maxamed El-Shennawy, ayaa sheegay in Madaxweynaha El-Sisi uu soo dhaweeyay booqashada Al-Burhan, isaga oo amaanay xidhiidhka walaaltinimo ee qoto dheer ee ka dhexeeya Masar iyo Sudan iyo horumarka laga gaaray iskaashiga labada dal.

Labada hoggaamiye ayaa ka wada hadlay arrimaha biyaha Niil, iyagoo mar kale ku adkeystay diidmada mideysan ee tallaabo kasta oo kelitalis ah oo lagu qaado Webiga Niil, gaar ahaan Webiga Buluugga ah, taasoo ka hor imaanaysa sharciga caalamiga ah.

Lt. Gen. Al-Burhan ayaa sheegay in Masar iyo Sudan ay leeyihiin mowqif mideysan oo ku saabsan Mashruuca Biyo-xireenka Dib-u-soo-kicinta Itoobiya (GERD), waxaana uu Madaxweynaha El-Sisi la meel dhigay in la xoojiyo hababka la-talinta iyo isku-duwidda si loo ilaaliyo danaha biyaha labada dal.

Kulanka ayaa sidoo kale looga hadlay xaaladda Sudan iyo dadaallada socda ee lagu doonayo in colaadda lagu soo afjaro laguna soo celiyo xasilloonida dalka. Madaxweynaha Masar ayaa mar kale caddeeyay taageerada buuxda ee Masar u hayso midnimada, madaxbannaanida, iyo xuduudaha Sudan, isaga oo diiday wax kasta oo carqaladeyn kara isku duubnida dalka ama abuuri kara maamulyo kala qaybsan.

Lt. Gen. Al-Burhan ayaa ku mahadceliyay taageerada joogtada ah ee Masar iyo dadaalka Madaxweynaha El-Sisi, isagoo sheegay inay ka tarjumayaan xidhiidhka qoto dheer ee labada ummadood iyo kaalinta ay ku leeyihiin dadaallada Sudan ee xal u helidda xaaladda adag ee dalka.

GAROWE ONLINE