Nigeria: 303 Arday iyo 12 Macallin oo La Afduubay, Warbixin Cusub oo La Soo Saaray

Muqdisho, Axad — Ururka Masiixiyiinta Nigeria (CAN) ayaa sheegay Sabtadii in tirada ardayda iyo macallimiinta laga afduubtay iskuulka St. Mary’s School ee gobolka Niger ay gaartay 303 arday iyo 12 macallin, taasoo ka badan tiradii hore ee la shaaciyay ee ahayd 215 arday.

War-saxaafadeed uu soo saaray Bulus Dauwa Yohanna, Guddoomiyaha CAN ee gobolka Niger, ayaa lagu sheegay in tirada la saxay kadib “hawl hubin iyo tirakoob dhammeystiran” oo lagu sameeyay iskuulka oo uu guddoomiyuhu booqday Jimcihii.

CAN ayaa sidoo kale xaqiijisay in 88 arday oo kale la qabtay intay isku dayayeen inay baxsadaan xilligii weerarka. Ardayda la afduubay waxay yihiin wiilal iyo gabdho da’doodu u dhaxayso 10 ilaa 18 sano.

Weerarka ka dhacay deegaanka fog ee Papiri ee gobolka Niger ayaa dhacay afar maalmood kadib markii 25 arday oo kale laga afduubay degmada Maga ee gobolka deriska la ah ee Kebbi, oo 170 km u jirta.

Ilaa iyo hadda ma jiro koox sheegatay mas’uuliyadda afduubka, mana jirto war cad oo ku saabsan xaaladda ardayda. Mas’uuliyiinta amniga ayaa sheegay inay hawlgelinayaan cutubyo gaar ah iyo ugaarsadayaal maxalli ah si loo badbaadiyo ardayda.

Guddoomiyaha CAN ayaa beeniyay hadal kasoo baxay dowlad-goboleedka gobolka Niger oo sheegay in iskuulku dib u furmay, isagoo xusay in iskuulka hore loogu amray inuu xirnaado sababo amni dartood.

“Wejigan dambe ayaa la yidhi waa wareegto. Anaga war rasmi ah naguma soo gaarin, waana isku day lagu leexinayo mas’uuliyadda,” ayuu yiri, isagoo ugu baaqay qoysaska inay “deggenaadaan oo tukasho ku adkaystaan.”

Afduubyada iskuullada Nigeria ayaa noqday dhibaato qaran oo sii xoogaysanaysa, iyadoo kooxaha hubeysan ay u bartilmaameedsadaan iskuullada si ay u helaan fiiro dheeraad ah oo caalami ah. Qaramada Midoobay ayaa sanadkii hore sheegtay in kaliya 37% iskuullada ku yaalla 10 gobol oo ay colaado ka jiraan ay haystaan nidaam digniin hore oo amni.

Dowladda gobolka Niger ayaa Sabtidii ku dhawaaqday in dhammaan iskuullada la xiro, si looga hortago afduubyo kale, sida uu sheegay Guddoomiyaha gobolka, Mohammed Umaru Bago, oo warfidiyeenka kula hadlay Minna kadib kulan degdeg ah oo uu la yeeshay saraakiisha amniga.

GAROWE ONLINE