Soomaaliya oo ka jawaabtey warar laga faafiyey kiiska badda

Go'aannada ICJ waxay ku xiran yihiin dhinacyada mana laha wax ikhtiyaar ah oo racfaan ah.

MUQDISHO, Soomaaliya - Soomaaliya ayaa sheegtay in aysan aqbali doonin dhexdhexaadin kale oo laga galo muranka badda ee kala dhaxeeya Kenya, kaasoo maxkamadda caalamiga ah ee ICJ ay go’aan ka gaartay bishii Oktoobar 2021.

Wasiiru-dowlaha Wasaaradda Arrimaha Dibadda Soomaaliya, Cali Maxamed Cumar (Balcad) oo la hadlay Guddi Xildhibaano ah, ayaa sheegay in Soomaaliya aysan wax wadahadal ah kula jirin Kenya oo lagu xalinayo Khilaafka.

Arrintan ayaa waxaa ka hadlay xubin ka tirsan guddiga baarlamaanka oo ka dalbaday dowladda federaalka inay caddeyso ka dib markii ay soo baxeen warar sheegaya in madaxweynaha Kenya William Ruto uu ka codsaday dhiggiisa Jabuuti Cumar Ismaaciil Geelle inuu gacan ka geysto dhexdhexaadinta heshiiska.

Cali Balcad ayaa taa bedelkeeda waxa uu sheegay in Muqdisho ay u hogaansami doonto go’aanka Maxkamadda oo inta badan dib u calaamadeeyay sohdinta badda ee labada dal.

Sida laga soo xigtay Soomaaliya, Jabuuti arrintan weli uma aysan soo xiriirin Soomaaliya, laakiin Muqdisho ayaa mustaqbalka diidi doonta wax walba oo noocaas ah.

Soomaaliya ayaa Kenya ku dacweysay Maxkamadda ICJ sannadkii 2014-kii iyadoo dooneysay inay soo celiso qeyb ka mid ah biyaha Kenya ee badweynta Hindiya.

Kenya iyo Jabuuti midkoodna si cad ugama hadlin sheegashadaas. Bishii Oktoobar 2021, Maxkamaddu waxay ogolaatay inta badan sheegashooyinka wayna laashay kuwa kale.

Go'aannada ICJ waxay ku xiran yihiin dhinacyada mana laha wax ikhtiyaar ah oo racfaan ah. Si kastaba ha ahaatee, labada waddan waxay u baahan doonaan inay dhab ahaantii dib u calaamadiyaan xuduudaha sida ay go'aamisay Maxkamaddu.

GAROWE ONLINE