Booliska oo goobaya dabley kadib toogasho gilgishay caasimada Austria

VIENNA, Austria - Laba qof ayaa la xaqiijiyey in la dilay, tirro kale oo sarkaal boolis uu ku jiro waxaa soo gaarey dhaawac markii dabley hubeysan ay weeraro ka fulisay lix goobood kala duwan caasimada Austria ee Vienna.

Taliska booliska oo sheegay in uu baadigoobayo dableyda ayaa tibaaxay in toogashada ay ka qaraxdey fagaaraha Seitenstettengasse ee bartamaha magaalada halkaasoo kooxaha hubeysan ay rasaasta ka bilaabeen.

Qaar kamid ah dableyda ayaa dad ku tooreeyay basas. Haweenay ku dhaawacantay weerarka waxaa kalkii dambe lasoo wariyey in ay dhimatay. Dadka waxaa lagu wargeliyey in aysan raacin gaadiidka dadweynaha.

Hogaamiyaha waddankaas, Sebastian Kurz oo cambaareeay weerarkan, ayaa wuxuu ku qeexay "mid salka ku haya feker argagixisanimo ah".

Warbaahinta maxaliga ah ayaa warisay in bartilmaameedka weerarada uu ahaa goob macbad u ah Yahuuda. Hasayaashee, hogaamiyaha bulshadda Israa'iil wuxuu sheegay in aysan hubin hadii hadafka uu ahaa xafiisyadooda.

Madaxda wadamada Yurub ayaa durba bilaabay in ay cambaareeyay weerarkan, iyagoo carabka ku adkeeyay in ay gara taagan yihiin dadka Austria.

Illaa haatan ma jirto koox dusha saaratay mas'uuliyadda falkaas. Balse, muddooyinkii u dambeeyay waxay Yurub wajaheysay weeraro noocaan ah markii madaxweynaha France, Emmanuel Macron uu u gefay Islaamka.

Macron oo si lamid ah meel uga dhacay sharafta Nabi Maxamed [NNKH] ayaa waddankiisa waxaa ka dhacay weeraro  culus oo lagu beegsaday Baadari Kaniisad iyo dadweynaha, waxaana la xaqiijiyey geerida in ka badan shan ruux.

GAROWE ONLINE