Faransiiska oo kordhiyey beegsiga Masaajida Muslimiinta

Xukuumadda Paris ayaa qiil ka dhiganaysa in ay la dagaalamayso wax ay ugu yeertey "gooni-u-goosashada Muslimiinta".

PARIS, France - Faransiiska ayaa ku dhawaaqay inuu xirayo masaajid kale, isagoo ku eedeeyay imaamka in la xagjireeyay, sida ay sheegtay warbaahinta Arbacadii.

Wasaaradda Arrimaha Gudaha ayaa bilowday howsha lagu xirayo Masjidka Obernai ee ku yaalla nawaaxiga Bas-Rhin, sida ay sheegeen TV-yada Faransiiska ee BFM TV iyo Le Figaro.

Wasiirka arrimaha gudaha Gerald Darmanin ayaa bartiisa Twitter-ka ku sheegay in 23 “goobo cibaadada gooni u goosad ah” la xiray labadii sano ee la soo dhaafay.

Waxa uu intaa ku daray in xiritaankan uu yimid ka dib markii uu madaxweynaha ka codsaday in lala dagaalamo "Gooni-u-satada Islaamka."

Wasaaraddu waxay ku eedaysay imaamka Masjidka Obernai inuu fuliyay hawlo wacdi ah oo xagjir ah, isagoo u qaatay dabeecad cadaawad ah oo ku wajahan bulshada Faransiiska iyo samaynta faallooyin kicin ah oo ka dhan ah qiyamka jamhuuriyadda.

Mas'uuliyiinta Paris ayaa waxay dhaleeceyn kala kulmeen beesha caalamka, hay’adaha aan dowliga ahayn iyo hay’adaha xuquuqul insaanka, gaar ahaan UN-ka, sababtoo ah waxa ay beegsadaan oo ay takooraan dadka muslimiinta ah.

GAROWE ONLINE