Iiraan: Afar qof oo loo daldalay in ay la shaqeynayeen Yahuuda

Fulinta xukunkan ayaa imaanaysa iyadoo Iran ay sii waddo la tacaalidda mudaaharaadyo socday muddo laba bilood ah.

TEHRAN, Iiraan - Iran ayaa dil toogasho ah ku fulisay afar qof, waxaana ay xukuntay saddex kale oo lagu eedeeyay inay la shaqaynayeen sirdoonka Israel, sidda ay ku warantey qaar kamid ah saxaafadda caalamka iyo warbaahinta maxaliga ah.

Afarta qof ayaa magacyadooda waxaa lagu kala sheegay Hossein Ordoukhanzadeh, Shahin Imani Mahmoudabad, Milad Ashrafi Atbatan, iyo Manouchehr Shahbandi Bojandi.

Shaqsiyaadkan ayaa la daldalay goor hore oo Axad maanta ah ah, sida lagu sheegay website-ka rasmiga ah ee garsoorka kaasoo soo xigtay saraakiil uusan magacyadooda soo bandhigin.

Xukunka dilka ah ayaa imaanaya iyadoo Iran ay sii waddo la tacaalidda mudaaharaadyo socday muddo laba bilood ah oo qarxay bartamihii bishii Sebtembar.

Banaanbaxyadda ayaa qarxay ka dib dhimashadii Mahsa Amini, oo ah haweeney da'yar oo ay xireen booliiska anshaxa "kadib markii ay u hoggaansamin xeerka labiska ee qasabka ah".

Iran ayaa ku eedaysay Maraykanka, Israa’iil, Boqortooyada Ingiriiska, Faransiiska, Jarmalka iyo Sucuudiga inay ka dambeeyaan qalalaasaha. 40 qof oo ajaanib ah ayaa la xidhay intii lagu jiray “rabshado” tan iyo bishii Sebtembar, sida uu sheegay garsoorka.

Xukunka dilka ah ee dhacay Axadii ayaan u muuqan mid si toos ah ugu xiran banaanbaxyada iyadoo shaqsiyaadka la daldalay la sheegay in ay xireen Ciidamada Ilaalada Kacaanka Islaamiga ah (IRGC) iyo wasaaradda sirdoonka muddo lix bilood ah ka hor.

GAROWE ONLINE