Iiraan oo toogatay "shaqsi u jaajuusayey Mareykanka iyo Yahuuda"

TEHRAN, Iran – Xeer-beegtada Iiraan ayaa ku dhawaaqdey toogashada shaqsi lagu eedeeyay in u basaasayey Mareykanka iyo Israa'iil. Mahmoud Mousavi Majd waxaa lasoo xiray sanadkii 2018-kii.

Isniintii ayaa la wariyey in lagu helay dambi ah "jaajuusnimo iyo in uu khiyaamayey qarankiisa". Sidaas waxaa baahiyey Mizan Online oo ah mareega rasmiga ah ee xeer-beegtada Jamhuuriyada Iiraan.

Gholamhossein Esmaili, afhayeenka xeer-beegtada Iiraan, ayaa xusay in turjumaankan hore lagu helay in uu lacago badan ka helay Sirdoonka dibadda u qaabilsan Mareykanka iyo Yahuuda ee CIA iyo Mossad.

Bishii hore ee June, xeer-beegtada ayaa warisay in Mahmoud uu basaasayey taliyihii ilaalada kacaanka ee Qaasim Sulaymaani, balse, waxay qirtay in khaarijinta Jeneraalkan uusan si toos ah ugu luglahayn.

Bishii Janaayo 3-deeda, Mareykanka ayaa duqeyn cirka ah oo uu ka fuliyey garoonka diyaaradaha Iraq ee Baqdaad wuxuu ku dilay Suleymaani, oo hogaaminayey sirdoonka dibadda Iiraan ee Quds Force.

Xukuumadda Tehran ayaa kaga jawaabtay dilkaas weerar sawaariiq loo adeegsaday oo ay ku beegsatay saldhigyadda ciidanka Mareykanka ee Ciraaq.

"Majd ma uusan kamid ahayn ilaalada kacaanka, balse wuxuu ku milmay goobo xasaasi ah isagoo gabaad ka dhiganaya turjumaanimo," ayuu Mizan raaciyey hadalkiisa.

Eedeymaha "lagu helay" waxaa kamid ah in uu lacag badan ku bedeshay gudbinta xogaha kolanyo lataliye, qalab milari iyo macluumaad warbaahin, taliyeyaal iyo dhaqdhaqaaqooda, goobo juquraafi ah, lambero iyo passwords. "Ugu dambeyntii, waa la qabtay, wuxuuna maaray baaris".

Todobaadkii hore ayay ahayd markii dowladda Iiraan ay toogatay nin kale oo ay ku eedeysay in uu hay'ada CIA u basaasayey xogta iibinta gantaaladeeda.

Toogasho lagu fulin lahaa saddex rag oo loo haysto in ay bishii November ka qeybgaleen banaanbax ka dhan ah dowladda ayaa dib loo dhigay kadib carro ay shacabka ka muujiyeen baraha bulshadda.

GAROWE ONLINE