Iran oo duqeyn doonta dal kasta oo ku garab siiya Mareykanka weerarka dalkaas

TEHRAN - Dowladda Iran ayaa digniin u dirtay dalalka deriska iyo kuwa Khaliijka Carabta, oo sheegtay in ay duqeyn doonto hadii ay saldhigyo siiyaan ama hawadooda u ogolaadaan Ciidamada Mareykanka inay u adeegsadaan weerarka dalkaas.

Iran waxay si rasmi ah uga digtay dalalka Ciraaq, Kuwayt, Imaaraatka Carabta, Qaadar, Baxrayn, iyo Turkiga oo la sheegay inay siinayaan Mareykanka hawadooda ama dhulkooda. Weerarka kasta oo laga soo qaado dalalka waxay Iran ka bixin doontaa jawaab, sida saraakiisha dalkaas ay sheegeen.

Kuwait ayaa la sheegay inay u xaqiijisay Iran in dalkeeda aan laga soo weerari doonin. Turkiga wuxuu xusay inaan soo gaarin digniinta Iran, balse hadii ay jirto loo marin doono wadooyinka dowladaha wax isku mariyaan.

Sanadkii 2001, Mareykanka ayaa u adeegsaday Kuwait, Bahrain, Qatar iyo dalal kale oo Bariga Dhexe ku yaalla inuu ka weeraro Iraq, oo xiligaas ka talinayay Saddam Hussein oo la riday dowladiisa, isna la daldalay markii la qabtay.

Iran waxay ku jirtaa xaalad diyaar-garow dagaal Mareykanka ay la gasho iyo mid Israel ka dhan ah, maadaama gobolka xaalada ka taagan ay Yahuuda mas'uul ka tahay.

GAROWE ONLINE