Iran oo "hakisay" wadahadii ay la lahayd Sacuudiga

Labada dal ayaa soo afjaray xiriirkooda diblomaasiyadeed sanadka markii uu ahaa 2016-kii.

TEHRAN, Iran – Iran ayaa "si ku meel gaar ah u hakisay" wadahadaladii tooska ahaa ee ay la lahayd Sacuudi Carabiya, sida laga soo xigtay xarun xiriir la leh hay'adda ugu sareysa ammaanka ee dalka.

Wasiirka arrimaha dibadda ee Ciraaq Fu’aad Xuseen ayaa Sabtidii ku dhawaaqay shir diblomaasiyadeed oo ka dhacay magaalada Antalya ee dalka Turkiga in wareeggii shanaad ee wada-hadallada labada dhinac ee gobolka ay martigelin doonto Baqdaad Arbacada.

Laakiin Nournews, oo xiriir la leh Golaha Sare ee Amniga Qaranka Iran (SNSC), oo soo qaatay qodobbada wadahadalka Boqortooyada, ayaa maanta oo Axad ah sheegay in Iran ay si kali ah u joojisay wadahadalka iyada oo aan la sheegin sababta.

Wasaaradda arrimaha dibadda ee Iran ayaa horay marar badan u sheegtay in wadanku uu diyaar u yahay in uu dib u bilaabo wadahadalka dhawaan.

Riyad iyo Tehraan ayaa sheegay in ay rajeynayaan in wadahadalku uu qaboojin karo xiisadda, laakiin waxay hoos u dhigeen rajada laga qabo guul weyn.

Labada dal ayaa soo afjaray xiriirkooda diblomaasiyadeed sanadkii 2016-kii markii safaaradda Sacuudiga ee Tehran ay weerareen dad mudaaharaadayaal ah ka dib dil toogasho ah oo ay ku fulisay hogaamiye diimeed caan ahaa oo Shiico ah oo ay fulisay Boqortooyada Sunniga u badan.

Riyad waxay taageertay ololihii "cadaadiska ugu sarreeya" ee  Donald Trump uu cunaqabateynta adag ku saaray Iran ka dib markii uu ka baxay heshiiskii nukliyeerka ee 2015 ee waddanku uu la galay quwadaha adduunka. Waxay sidoo kale Iran ku eedaysay weerar weyn oo lagu qaaday xarumaheeda saliidda 2019, eedeymaha Tehran ayaa beenisay.

Labada dal ayaa sidoo kale dhinac iska soo horjeeda ka wada dagaalka Yemen, halkaasoo xulafada uu Sacuudigu hoggaamiyo ay tan iyo 2014-kii kula dagaallamayeen dhaqdhaqaaqa Xuutiyiinta ee xulafada la ah Iran.

Laakiin wareegii ugu horreeyay ee wadahadallo sir ah, oo lagu qabtay caasimadda Ciraaq bishii Abriil 2020, ayaa muujisay dhalaalid suurtagal ah. Wadahadallada ayaa si rasmi ah loo xaqiijiyay bilo kadib.

Wadahadallada ayaa yimid iyadoo Iran iyo quwadaha adduunku ay mar kale fadhiyeen Vienna si ay u soo celiyaan heshiiskii nukliyeerka, oo si rasmi ah loo yaqaan Qorshaha Wadajirka ah ee Guud (JCPOA). In ka badan 11 bilood ka dib, wada xaajoodka ka socda caasimadda Austria ayaa hadda loo maleynayaa inuu ku dhow yahay xariiqda dhammaadka.

Horaantii sanadkan, Iran waxa ay sheegtay in saddex ka mid ah dublamaasiyiinteeda loo aqbalay Sucuudiga ka dib dhowr sano si ay mar kale xafiis wakiil uga samaystaan Ururka Iskaashiga Islaamka (OIC) ee Jeddah.

GAROWE ONLINE