Iran oo Ruushka ka iibsanaysa S-400 xilli uu dagaalka Bariga Dhexe uu socdo

MOSCOW — Ruushka iyo Iran ayaa wada hadallo ka yeelanaya suurtagalnimada in Moscow ay Tehran ka iibiso nidaamka difaaca cirka ee S-400, xilli uu sii socdo dagaalka milatari ee u dhexeeya Iran iyo Mareykanka, sida uu baahiyey wargeyska The Telegraph.

Sarkaal sare oo Iiraani ah ayaa wargeyska u sheegay in Tehran ay rajo wanaagsan ka qabto in Madaxweynaha Ruushka Vladimir Putin uu ugu dambeyn oggolaado in Iran la siiyo nidaamyada difaaca cirka ee S-400, kuwaas oo ay muddo sannado ah dooneysay.

Warbixinta ayaa sheegtay in Hoggaamiyaha Sare ee Iran, Mojtaba Khamenei, uu Khamiistii magaalada Moscow u diray madaxa amniga dalkaas, Mohsen Rezaei, isaga oo u sii dhiibay Putin warqad gaar ah oo dalabkeeda ugu weyn uu ahaa in Ruushku Iran siiyo nidaamka difaaca cirka ee S-400.

Wada hadalladan ayaa imaanaya iyadoo Iran ay dooneyso inay xoojiso awooddeeda difaaca cirka, xilli ay sii socdaan iska horimaadyada milatari ee kala dhexeeya Mareykanka.

Rezaei oo ka hadlay kulamadii uu Moscow kula yeeshay Putin ayaa sheegay in labada dhinac ay ka wada hadleen arrimo muhiim u ah gobolka, xaaladda dagaalka kadib iyo qaababka amniga ee mustaqbalka.

"Waxaa Madaxweyne Putin lagala hadlay arrimo muhiim ah oo gobolka khuseeya, waxaana dhacay wada hadallo muhiim ah oo ku saabsan xaaladda dagaalka kadib iyo qaababka amniga gobolka," ayuu yiri Rezaei.

Wada hadallada ayaa sidoo kale la sheegay inay ku saabsanaayeen qorshe lagu dhisayo dhuun cusub oo gaaska qaadda, taas oo isku xiri doonta Ruushka iyo Iran, arrintaas oo muujineysa dadaallada labada dal ay ku doonayaan inay xoojiyaan iskaashigooda dhaqaale iyo istaraatiijiyadeed.

Haddii heshiiska S-400 la gaaro, wuxuu noqon karaa tallaabo muhiim ah oo lagu ballaarinayo iskaashiga milatari ee Moscow iyo Tehran, gaar ahaan iyadoo Iran ay wajahdo cadaadis milatari iyo weerarro la xiriira dagaalka ay kula jirto Mareykanka.

Nidaamka S-400 oo uu sameeyay Ruushka ayaa ah hub casri ah oo difaaca cirka ah, kaas oo loogu talagalay inuu ogaado kana hortago diyaaradaha dagaalka, gantaallada noocyadooda kala duwan iyo khataraha kale ee cirka.

Wada hadalladan ayaa sidoo kale ka hor imaanaya hadallo dhowaan uu jeediyey Madaxweynaha Mareykanka Donald Trump, kaas oo sheegay in Ruushku aanu wax taageero ah siinayn Iran dagaalka ay kula jirto Washington.

Trump ayaa ku adkeystay in Moscow aysan Tehran ka caawineyn dagaalka "haba yaraatee", xilli uu ka hadlayey isbeddellada la xiriira cunaqabateynta iyo heshiis cusub oo dhinaca tamarta ah oo lala galay Ruushka.

Si kastaba, wararka ku saabsan wada hadallada u dhexeeya saraakiisha Ruushka iyo Iran ayaa muujinaya in iskaashiga milatari iyo istaraatiijiyadeed ee labada dal uu weli yahay arrin miiska saaran.

Ilaa hadda, Moscow iyo Tehran si rasmi ah uma aysan xaqiijin heshiis ku saabsan iibinta nidaamyada S-400, mana cadda in wada hadalladu horseedi doonaan heshiis hub oo rasmi ah.

GAROWE ONLINE