Maraykanka oo ciidamo dheeraad ah geynaya bariga Yurub

Moscow ayaa dhaleeceysay tallaabada Mareykanka gelinkii dambe ee Arbacadii, iyadoo ku tilmaantay mid "wax burburinaya".

WASHINGTON, USA – Mareykanka ayaa 2,000 askari oo dheeri ah u diraya Yurub wuxuuna dib u dhigaya 1,000 kale oo ka socda Jarmalka oo loo dirayo Romania si loo xaqiijiyo "difaaca adag" ee xubnaha NATO ee Yurub, Pentagon-ka ayaa sidaas sheegay iyada oo uu sii kordhayo ismariwaaga u dhexeeya Ruushka iyo Ukraine.

Afhayeenka Wasaaradda Difaaca Mareykanka John Kirby oo la hadlay warbaahinta Arbacadii ayaa sheegay in soo daabulidda ciidamada ay dhici doonto maalmaha soo socda. Waxa uu intaasi ku daray in ay ka duwan tahay, oo ay dheer tahay, 8,500 oo askari oo Pentagon-ka ay heegan galiyeen todobaadkii hore.

Kirby wuxuu carabka ku adkeeyay, si kastaba ha ahaatee, in ciidamada Mareykanka aan la geyn doonin Ukraine, oo aan xubin ka ahayn NATO.

"Dhaqdhaqaaqyadani waxay tusaale u yihiin caalamka in aan diyaar u nahay inaan u xaqiijino xulafadayada NATO oo aan ka hortagno oo aan ka difaacno gardarro kasta," ayuu yiri.

Aqalka Cad ayaa Arbacadii ku dhawaaqay in 1,700 oo askari laga diri doono Fort Bragg ee gobolka North Carolina ee dalka Mareykanka lana geyn doono Poland halka 300 oo kalena laga diri doono saldhiggaas loona diri doono Jarmalka.

Milateriga Ruushka ayaa ciidamo ku uruurinayey meel u dhow xuduudka dalkaasi uu la wadaago Ukraine, taasoo dhalisay xiisad diblomaasiyadeed, waxayna sare u qaaday cabsida Mareykanka iyo Yurub ka qabaan in Moscow ay isu diyaarineyso duullaan soo socda oo ay ku qaado deriskeeda.

Ruushka ayaa diiday inuu qorsheynayo inuu duulaan ku qaado, balse wuxuu si weyn uga soo horjeestay dadaalka Ukraine ay ugu biireyso NATO. Moscow waxay sidoo kale dooneysaa dammaanad amni oo ah in xulafada uu hoggaamiyo Mareykanka ay joojin doonaan ballaarinta jamhuuriyadii hore ee Soofiyeedka, laakiin Washington iyo NATO ayaa diiday dalabka iyagoo ah "mid aan bilow ahayn".

Arbacadii, Kirby ayaa warbaahinta u xaqiijiyay in Washington ay u oggolaatay Moscow in ay xaqiijiso inaysan jirin gantaallada maraakiibta ee Tomahawk ee saldhigyada Romania iyo Poland - iyadoo shardi ah in Ruushka uu ku abaalmariyo "tallaabooyin hufan".

Kirby wuxuu sheegay in kasta oo Maraykanku aanu soo bandhigin dukumeentiyada dadweynaha, haddana waxay muujinayaan in Washington ay dhab ka tahay in xiisadda lagu xalliyo qaab dublamaasiyadeed.

Moscow ayaa dhaleeceysay tallaabada Mareykanka gelinkii dambe ee Arbacadii, iyadoo ku tilmaantay mid "wax burburinaya".

Hawlgalka Mareykanka ayaa ah "tallaabooyin wax-burburin ah, kuwaas oo kordhinaya xiisadda militari waxayna yareynayaan baaxadda go'aannada siyaasadeed," ayuu wasiir ku xigeenka arrimaha dibadda Ruushka Alexander Grushko oo la hadlay wakaaladda wararka ee Interfax.

Laakiin af hayeenka wasaaradda arrimaha dibadda ee Mareykanka Ned Price ayaa diiday sheegashada Moscow ee ah in Washington ay sii kordhineyso xiisadda iyadoo ciidamo dheeraad ah u diraysa Yurub, isagoo ku eedeeyay Ruushka inuu isku dayayo inuu "xaqiiqda ka rogo".

GAROWE ONLINE