Pakistan: safiirrada Norway iyo Philippine oo ku dhintey shil diyaaradeed
-
- Posted On 09-05-2015, 06:11AM
May 9, 2015 (GO)- Diyaarad nooca qumaatiga u kaca ah oo siddey 17 qof oo ay ku jiraan danjireyaasha Norway, Malaysia, Indonesia iyo Philippine u jooga Pakistan iyo xaasaskooda ayaa kusoo dhacdey gobolka Gilgit-Baltistan ee ku yaalla waqooyiga dalka Pakistan.
Todoba qof ayaa ku geeriyoodey shilkaas waxaana kamid ahaa safiirkii Norway u joogey Pakistan, Leif Larsen, safiirkii Philippines Domingo Lucenario, xaasaska safiirrada Malaysia iyo Indonesia, labadii duuliye iyo qof kale oo kamid ahaa shaqaalaha diyaaradda.
Dadka dhaawacmey oo iyagana tiradoodu toban tahay islamarkaana qaarkood xaaladoodu halis tahay, waxaa kamid ah safiirka Holland u fadhiya Islamabad Marcel de Vink iyo safiirka Malaysia Ambassador Hasrul Sani Mujtabar.
Af-hayeen u hadlay militeriga Pakistan oo lagu magacaabo Major-General Asim Bajwa, ayaa sheegay in diyaaradda cilladi lasoo deristey ayna soo dhacdey xilli ay mareysey dooxada Naltar oo qiyaastii 300km u jirta caasimadda Islamabad.
Mas'uuliyiintan ayaa kusii jeedey gobolka Gilgit-Baltistan halkaasoo booqasho afar maalin ah uu ku mari lahaa Ra'isal Wasaaraha Pakistan Nawaz Sharif.
Sharif ayaa soo gaba gabeeyey booqashada, wuxuuna shilka dhacay ku tilmaamey mid musiibo ah oo aad looga naxo, isagoo tacsi u direy dowladaha iyo qoysaska dadka shilkaas ku geeriyoodey u dhasheen.
GAROWE ONLINE
