Russia v Ukraine: Walbahaarkii reer galbeed ee xaqiiqoobay

Cambaareynta caalamiga ah ee duullaanka Ruushka ee Ukraine ayaa sii kordheysa

ANKARA, Turkey - Madaxweynaha Turkiga Recep Tayyip Erdogan ayaa diiday tallaabada militari ee Ruushka ay ku qaaday Ukraine, isagoo ku tilmaamay "wax aan la aqbali karin" kadib khudbad uu telefishinka ka jeediyay Khamiistii.

Erdogan ayaa sheegay inuu horay ula hadlay madaxweynaha Ukraine Volodymyr Zelensky, wuxuuna ku celiyay inuu taageersan yahay midnimada dhuleed ee Ukraine.

"Waxaan si dhab ah uga xunahay in Ruushka iyo Ukraine, oo aan u aragno inay yihiin dalal saaxiibo ah iyo in aan leenahay xiriir siyaasadeed iyo bulsho, inay si fool ka fool ah u kulmaan," ayuu raaciyay.

Wuxuu ku daray: “Waxaan qaybteena ka qaadan doonaa sidii aan u xaqiijin lahayn ammaanka qof kasta oo ku nool Ukraine, gaar ahaan muwaadiniintayada iyo walaalaha Tataarka ee gobolka".

Erdogan ayaa kula hadlay Vladimir Putin taleefoon Arbacadii, halkaas oo uu ku muujiyay diidmadiisa tillaabooyinka madaxweynaha Ruushka ee ka dhanka ah madax-bannaanida Ukraine.

Cambaareynta caalamiga ah ee duullaanka Ruushka ee Ukraine ayaa sii kordheysa, iyadoo hoggaamiyeyaal badan ay sidoo kale ballan qaadeen cunaqabatayn cusub oo adag oo saaran Moscow saacadaha soo socda.

Ra'iisul wasaaraha Jarmalka, Olaf Scholz, ayaa dhaleeceeyay howlgallada militari ee Ruushka, isagoo ku tilmaamay "fal ka fiirsasho la'aan ah oo uu sameeyay madaxweyne Putin, maalin aad u xun Ukraine iyo maalin madow oo Yurub ah."

Wasaaradda arrimaha gudaha ee Ukraine ayaa sheegtay Khamiista in saddex diyaaradood oo helikobter ah oo Ruushku leeyahay lagu soo riday gobolka Kyiv.

“Hal helikobter ah oo Ruushku leeyahay oo K-52 ah iyo saddex helikobter oo u dhow Gostomel ayaa lagu soo riday gobolka Kyiv, meel u dhow Mezhyhirya,” ayay wasaaraddu ku sheegtay war qoraal ah oo lagu daabacay website-keeda.

Horaantii Khamiista, Saraakiisha Guud ee Ciidamada Qalabka Sida ee Ukraine ayaa sheegay in lix diyaaradood oo Ruushku leeyahay la soo riday markii ay ciidamadu weerareen Ukraine. Milateriga Ruushka ayaa beeniyay sheegashada, wakaaladda wararka dowladda ee TASS ayaa werisay.

Ra'iisul wasaaraha Britain, Boris Johnson ayaa cambaareeyay duulaanka Ruushka ee Ukraine, isagoo khudbad laga sii daayay TV-ga ku sheegay in Vladimir Putin "uu weeraray dal ay saaxiibo yihiin isaga oo aan wax daandaansi ah geysan, isagoo aan haysan cudur daar la aamini karo".

"Cabsidayada ugu xun ayaa hadda rumowday, dhammaan digniinaheenna waxay caddeeyeen si naxdin leh oo sax ah," ayuu raaciyey Johnson oo ku nuux-nuux-sadey in ay qaadayaan talaabooyin ay ku waxyeeleenayaan dhaqaalaha Russia.

GAROWE ONLINE