Sacuudiga oo Dil Ku Fuliyay Muwaadin Soomaaliyeed

RIYADH, Saudi Arabia - Waxaa la sheegay in Sacuudiga uu xukun dil ah ku fuliyay muwaadin Soomaaliyeed oo lagu magacaabi jiray Maxamed Nuur Xuseen, kaasoo lagu helay in uu geliyay dalkaas daroogo nooca Xashiishka ah. 

Maxamed Nuur Xuseen ayaa lagu fuliyay  xukunka Axaddii lasoo dhaafay gudaha magaalada Najran, oo ku taalla koonfurta Sacuudi Carabiya. Ninkan ayaa madaxa looga jaray seef, sida uu caadada u yahay xukunka dilka ee dalkaas.

Qoyska Maxamed ayaa sheegay in xukunka wiilkooda lagu fuliyay uusan cadaalad ahayn, iyagoo sheegay in wiilkooda aan loo oggolaan inay helaan maxkamad cadaalad ah ama ay racfaan ka qaataan xukunka dilka ah.

Waxay sheegeen in Xuseen aan loo oggolaanin habraacyada sharciga ee maxkamadaha, islamarkaana aysan siinin wiilkooda fursado ay ugu qabtaan qareen ama rafcaan ku helaan, waxaana dilkiisa uu noqday mid la dedejiyay.

Sacuudi Carabiya waxay ka mid tahay dalalka adduunka ee leh nidaam sharciga adag, gaar ahaan marka la eego ciqaabta dilka ee ku saabsan dembiyada daroogada, dilalka, iyo argagixisada. Wasaaradda Arrimaha Gudaha ee Sacuudi Carabiya ayaa sheegtay in xukunka dilka u yahay go’aanka adag oo kasoo baxay dowladda oo ka dhanka ah ka ganacsiga daroogada iyo dambiyada kale.

Xukunkan dilka ah wuxuu cabsi-geliyay muwaadiniinta Soomaaliyeed ee ku nool dalka Sacuudi Carabiya, gaar ahaan kuwa dembiyo lagu soo eedeeyay oo tiradooda lagu qiyaasay in ka badan 50 qof oo xabsi ku jira, kuwaas oo badankooda loo haysto dambiyo la xiriira daroogo.

Dowladda Soomaaliya iyo safaaradaha ayaa si joogto ah uga dalbanayay Sacuudi Carabiya in loo muujiyo naxariis iyo cafiyo muwaadiniintaasi, iyagoo si toos ah ula xiriiro dowladda Sacuudi Carabiya si loo beddelo xukunka dilka isla markaana loogu beddelo xukunka xabsi dheer. Qoysaska dadka xabsi ku jira ayaa sidoo kale codsaday in dowladda Soomaaliya ay gacan ka geysato sidii loo joojin lahaa dilalkan.