Shehbaz Sharif: Waa kuma ra'iisul wasaaraha cusub ee Pakistan?

ISLAMABAD, Pakistan - Baarlamaanka Pakistan ayaa u doortay Shehbaz Sharif inuu noqdo ra'iisul wasaaraha cusub ee Pakistan ka dib markii uu dhamaadkii todobaadka xilka kaga qaaday Imran Khan codka kalsoonida.

Ka hor codeynta Isniintii, xildhibaano ka tirsan xisbiga Khan ee Pakistan Tehreek-e-Insaf (PTI) ayaa si guud isu casilay, iyagoo qaadacay doorashada Sharif, walaalka ka yar ee Nawaz Sharif oo saddex jeer xilkan qabtey.

Shehbaz Sharif oo khudbadii ugu horeysay jeediyay isaga oo ah Ra’iisul Wasaaraha dalka ayaa ku dhawaaqay in la kordhinayo mushaaraadka, gunnada howlgabka iyo mushaarka ugu yar ee shaqaalaha.

Sidoo kale, wuxuu ka hadlay fashilka ku yimid siyaasadda arrimaha dibadda ee dowladda waqtigeedu dhammaaday, wuxuuna sheegay inuu dardargelin doono mashruuca balaayiin dollar ee Shiinaha-Pakistan Economic Corridor (CPEC) iyo dib u soo celinta xiriirka go’ay ee saaxiibada iyo xulafada.

Ra'iisul wasaaraha ayaan lumin fursad uu kula macaamilo eedeymaha uu Khan u jeediyay ee ah in Mareykanka uu maleegayay mucaaradkiisa si ay u ridaan dowladdiisa.

Shariif ayaa amray warbixin ka siiyaan guddiga baarlamaanka ee amniga qaranka. Saraakiisha sare ee rayidka iyo kuwa militariga, oo uu ku jiro safiirka Pakistan ee Washington, ayaa sidoo kale ka qeybgali doona kulanka.

"Waan ka tagayaa xilka haddii ay jirto cadaymo aan la garanayn [oo aniga iga dhan ah]," ayuu yiri, isaga oo ku nuux-nuux-saday in kulankaas uu noqon doono mid u furan warbaahinta madaxa-banaan iyo tan dowladda.

Waa kuma Shehbaz Sharif?

Shehbaz Sharif, oo 70 jir ah, waxa uu soo noqday madaxa guud ee Punjab, oo ah gobolka ugu dadka badan Pakistan, ka hor inta aanu Imran Khan xukunka la wareegin 2018.

Mr Sharif, oo hogaamiya xisbiga Pakistan Muslim League Nawaz (PMLN), ayaa ku caan baxay shaqo badan iyo hawlkarnimo, waxaana lagu tiriyaa inuu sameeyay horumarro la taaban karo oo kaabayaasha dhaqaalaha ah.

Si la mid ah walaalkiis, Shehbaz ayaa sidoo kale wuxuu la kulmay eedeymo la xirira musuqmaasuq, wuxuuna muddo ku qaatay xabsiga intii uu xilka hayay Mr Khan.

Ma jirin wax dambi ah oo lagu soo oogay, wuxuuna ku adkaystay in eedeymahaasi ay yihiin kuwo siyaasadeysan. Wiilka Shehbaz Sharif, Hamza, ayaa rajeynaya inuu raaco wadadii aabihiis oo uu noqdo madaxa cusub ee Punjab.

Shehbaz Sharif wuxuu had iyo jeer ku jiray kooxda sida gaarka ah uu talooyinka uga qaato walaalkiis ka weyn, Nawaz Sharif, oo soo noqday wasiirka koowaad saddex jeer balse aan xukunka dhameysan marnaba.

Halka Nawaz uu si bareer ah u dhaleeceeyay ciidanka ka dib markii xukunka laga tuuray, si kastaba ha ahaatee, Shehbaz waxa uu door biday dib u heshiisiin "samaynta". Siyaasadaas waa tan maanta xukunka dhaxal-siisay.

GAROWE ONLINE