Taliyihii militeriga Kenya oo is casiley iyo mid cusub oo la magacaabay
-
- Posted On 19-04-2015, 04:35AM
April 19, 2015 (GO)- Madaxweynaha Kenya Uhuru Kenyatta ayaa Jen. Samson Mwathethe usoo magacaabay taliyaha cusub ee militeriga Kenya, kaddib markii uu is casiley Jen. Julius Karangi oo isagu muddo dheer xilkaas soo hayey.
Qoraal kasoo baxay madaxdooyada Nairobi ayaa lagu yiri sidan "Madaxweynaha Kenya wuxuu taliyaha cusub ee militeriga usoo magacaabay Jen. Mwaththe, wuxuuna xilka la wareegi doonaa toddobaadka soo socd."
Taliyihii hore ee ciidamada Kenya Jen. Karangi ayaa cadaadis badan kala kulmey jawaabtii ay ciidamada dalkaasi ka bixiyeen weerarkii Westgate Mall oo Al-shabaab ay weerartay sannadkii 2013-kii, iyadoo ciidamada lagu eedeeyey in ay geysteen boob hantiyeed intii howlgalku socday.
Sidoo kale, Madaxweynaha Kenya ayaa bishii December ee sannadkii hore magacaabay taliyaha cusub ee booliiska iyo wasiirka arrimaha gudaha dalka Kenya, kuwaasoo iygaana lagu eedeeyay inay ku fashilmeen sugidda amniga.
Al-shabaab ayaa weerarro is-daba-joog ah ka geysanaysay gudaha Kenya tan markii ciidamada Kenya gudaha usoo galeen dalka Soomaaliya.
Afar todobaad ayaa laga joogaa markii Al-shabaab weerartey dhismaha Jaamacadda Gaarisa. Weerarkaas waxaa ku dhintey 148 qof oo ardey u badnaa waxaana ku dhaawacmey ku dhowaad labo boqol oo qof oo kale.
GAROWE ONLINE
