Tobanaan qof oo ku dhintey roobab mahiigaan oo ka da'ay Pakistan

Ra'iisul wasaaraha Pakistan, Shahbaz Sharif, ayaa Sabtidii muujiyay sida uu uga xun yahay khasaaraha nafeed.

ISLAMABAD, Pakistan - Roobab xooggan ayaa ku dhuftay gobollada waqooyi-galbeed ee waddanka Pakistan waxaana ka dhashay burburka guryo shacab ah in ay ku dhintaan ugu yaraan 25 qof kale oo badankooda ah dad rayid ah.

Degmooyinka Bannu, Lakki Marwat, iyo Karak ee gobolka Khyber Pakhtunkhwa ayuu Sabtidii ka da'ay roobkan, sidda uu sheegay sarkaal sare oo ka tirsan Hay'adda badbaadada Khateer Axmed.

"Ku dhowaad 145 qof oo kale ayaa ku dhaawacantay kadib markii geedo la rujiyay ay soo dumiyeen taawaradii korontada," ayuu hadalkiisa kusii daray sarkaalkan.

Saraakiisha ayaa ku howlan sidii gurmad deg deg ah loo gaarsiin lahaa dadka dhaawaca ah. Bishii hore, ilaa tobaneeyo qof, oo ay ku jiraan haween iyo carruur, ayaa ku dhintay kadib markii uu soo da'ay baraf aan caadi ahayn.

Ra'iisul wasaaraha Pakistan, Shahbaz Sharif, ayaa Sabtidii muujiyay sida uu uga xun yahay khasaaraha nafeed ee ka dhashay roobabka dabaysha watay, wuxuuna faray mas'uuliyiinta inay sare u qaadaan howlaha gargaarka.

Dhanka kale, Shariif ayaa waxa uu ku amray saraakiisha inay dejiyaan tallaabooyin deg-deg ah, iyadoo Duufaanta Biparjoy ay kusoo wajahan tahay Badda Carabta.

Sanadkii la soo dhaafay, Pakistan waxaa ka dhacay daadadkii ugu xumaa ee taariikhda dalkaas ka dhasha roobab mahiigaan ah. Waxay dileen ugu yaraan 1,739 qof, oo ay ku jiraan 647 carruur ah, waxayna saameeyeen 33 milyan oo qof.

GAROWE ONLINE