Trump oo sheegay inuu tallaabo adag ka qaadi doono Yurup hadii dib loo doorto
-
GAROWE ONLINE
- Posted On 25-07-2023, 06:10PM
WASHINGTON - Madaxweynihii hore ee Mareykanka Trump ayaa sheegay mar uu wareysi siinayay "Fox News", in Mareykanka uu culeys ka saaranyahay caawinta Ukraine. Wuxuu intaas ku daray in ay bixiyaan gargaarka, iyaga oo aan wax halis ah uga imaan karin dagaalka socda, maadaama ay badweynta ka xigto.
Waxa uu sidoo kale xaqiijiyay in marka uu ku laabto Aqalka Cad, uu ku qasbi doono wadamada Yurub inay bixiyaan wixii uu Mareykanka ka siiyay Ukraine, haddii aysan ka badnayn.
Waxa uu sheegay in mudnaanta koowaad haddii uu noqdo madaxweynaha 2024 uu siin doono hubinta in Yurub ay bixiso lacago badan oo lagu maalgelinayo xoojinta difaaca Ukraine, halkii uu Mareykanku kaligiis qaadi lahaa kharashka.
Trump ayaa yiri "muhiimada koowaad waa lacagta,, waxaan u sheegi doonaa Yurub, lacagta aad bixisaan waxaa ku darataan $100 bilyan".
Waxa uu tixgeliyey in waxa Yurub ay ku maalgelinayaan dagaalka ay aad u yar yihiin marka loo eego waxa Maraykanku bixiyo. Waxa uuna waydiiyay, "Maxaynu u bixinaa 150 bilyan oo doollar halka ay iyagu (Yurub) bixiyaan 20 bilyan?".
Waxa uu sidoo kale sheegay in Yurub aysan sheega karin dhaqaale yari, maadaama dhaqaalaha Yurub uu la mid yahay kan Mareykanka.
GAROWE ONLINE
