Trump oo soo jeediyay in la daadgureeyo dadka ku nool Gaza

(GO) - Donald Trump, madaxweynaha Mareykanka, ayaa soo jeediyay qorshe muran dhaliyay oo ku saabsan in dadka ku nool Marinka Gaza lagu wareejiyo dalalka deriska la ah sida Masar iyo Urdun. Trump, oo la hadlayay saxaafadda isagoo sii fuulaya diyaarada Air Force One, ayaa yiri: “Waxaan rabaa in Masar qaadato dadkan, sidoo kale waxaan rabaa in Urdun qaadato dadkan. Waxaan ka hadlaynaa hal milyan iyo bar dad ah, oo si buuxda looga nadiifiyo meeshaas.”

Qorshahan uu soo jeediyay madaxweynaha ayaa waji cusub ku soo kordhinaya siyaasadda Mareykanka ee gobolka, oo muddo dheer diiradda saareysay xalka laba dal, kaas oo ku saleysan abuurista dawlad Falastiin ah oo ku taalla Gaza iyo qaybo ka mid ah Daanta Galbeed ee la haysto. Trump ayaa sheegay inuu qorshahan kala hadlay boqorka Urdun, King Abdullah, Sabtidii, islamarkaana uu damacsan yahay inuu arrintan ku soo hadal qaado Axadda markii uu la xiriirayo madaxweynaha Masar, Abdel Fattah al-Sisi.

Madaxweynaha ayaa sheegay in xaalada Gaza tahay “meel burbur xoog leh ka jiro, wax walbana ku burbureen, dadka badanna ay halkaas ku dhimanayaan.” Wuxuu intaa ku daray: “Waxaan doorbidi lahaa inaan kaashanno qaar ka mid ah dalalka Carabta oo aan meel kale ka dhisno guryo ay dadkan ku noolaadaan si nabad ah, ugu yaraan mar uun.”

Trump waxa uu sheegay in qorshahan dadka loogu rarayo “uu noqon karo mid ku-meel-gaar ah ama mid muddo dheer qaadan kara.” Tirada dadkii ku noolaa Gaza ka hor dagaalka 2023 ayaa lagu qiyaasay 2.2 milyan oo qof.

Masar iyo Urdun, oo dagaalka Gaza ka bilowday bishii Oktoobar ee sanadkii hore si joogto ah u diiday qorshe kasta oo lagu soo wareejinayo dadka Falastiiniyiinta ah, ayaa sheegay in arrintani ay tahay “baabi’inta qadiyadda Falastiin” oo lagu fududeynayo dhibaatada Israel ee gobolka. Wasiirka arrimaha dibadda Urdun, Ayman Safadi, ayaa sheegay in mowqifka boqortooyada uu yahay mid aan marnaba isbeddelin, islamarkaana la doonayo in dadka Falastiiniyiinta ahi ay ku sii nagaadaan dhulkooda.

Masar ayaa sidoo kale si cad u diiday qorshaha Trump. Wasaaradda arrimaha dibadda Masar ayaa bayaan ay soo saartay ku sheegtay in Masar aysan aqbali doonin dadaal kasta oo lagu wiiqayo xuquuqda aan laga noqon karin ee dadka Falastiiniyiinta, oo ay ku jiraan isku-day kasta oo dhulka lagu banneynayo ama lagu dhiirrigelinayo in dadkii lahaa laga raro, ha ahaato muddo-gaaban ama muddo-dheer.

Hamas ayaa si adag uga jawaabtay hadallada Trump, iyagoo ku tilmaamay “mid aan marnaba la aqbali karin.” Waxay ku boorriyeen Masar iyo Urdun inay si adag uga hortagaan dadaallada noocaas ah.

Khubarada gobolka iyo diblomaasiyiinta caalamiga ah ayaa sidoo kale ka digay in qorshahan uu sababi karo xaalado khatar ah. H.A. Hellyer, oo ah cilmi-baare sare oo ka tirsan Center for American Progress ee Washington, ayaa sheegay in qorshaha Trump uu khatar weyn ku yahay xasilloonida Urdun iyo Masar, iyadoo uu sababi karo isku dhacyo dhexmara dagaalyahannada Falastiiniyiinta iyo Israel gudaha dalalkan.

“Wuxuu sii hurinayaa nacaybka Carabta, sababtoo ah taariikhdu waa mid cad. Markasta oo dadka Falastiiniyiinta ahi ay ka tagaan qeyb ka mid ah dhulkooda, marnaba dib uguma soo noqon,” ayuu yiri Hellyer. “Qorshaha Trump waxaa loo arki doonaa mid qowmiyad-sifeyn ah oo caalamku diidi doono.”

Si kastaba ha ahaatee, hadalka Trump ayaa soo dhaweeyay taageerada siyaasiyiinta midigta fog ee Israel. Wasiirka maaliyadda Israel, Bezalel Smotrich, ayaa ku tilmaamay fikradda Trump “mid cajiib ah,” halka Itamar Ben-Gvir, wasiirkii hore ee amniga qaran ee Israel, uu ku tilmaamay qorshaha mid dhiirrigelin leh.

Trump ayaa sidoo kale xaqiijiyay in Pentagon-ka uu ka qaaday xayiraaddii ku meel-gaarka ahayd ee loo saaray bixinta bambooyin miisaankoodu yahay 2,000 rodol oo loogu talagalay Israel. “Waxaan u fasaxnay maanta, waxayna heli doonaan,” ayuu yiri madaxweynaha.

Dadka reer Falastiin iyo bulshooyinka Carabta oo dhan ayaa si isku mid ah uga soo horjeestay hindisaha Trump, iyagoo ku tilmaamay mid halis gelinaya jiritaanka Falastiiniyiinta iyo mid sii fogeyneysa rajadii xal nabadeed ee gobolka.

GAROWE ONLINE