Ukraine oo digniin u dirtay wadamadda reer Galbeedka

Fariintan ayaa ku saabsan wadaxaajoodyo ay la yeeshaan dowladda Ruushka.

KIEV, Ukraine – Dowladda Ukraine ayaa ku boorisay wadadama reer galbeedka in ay sii wadaan “feejignaan iyo adkeysiga” wadahadalada ay kula jiraan Moscow, maalin kadib markii madaxweyne Volodymyr Zelenskyy uu uga digay saaxiibadiisa reer galbeedka in ay ka fogaadaan “argagax” ka dhalanaya tirada badan ee ciidamada Ruushka ee soo dhoobay xadka.

Dhaqdhaqaaqyadii ugu dambeeyay ee diblumaasiyadeed, Wasiirka Arrimaha Dibadda ee Ukraine Dmytro Kuleba ayaa wadahadal la yeeshay dhiggiisa Faransiiska Yves Le Drian Sabtidii

Wadahadallada ayaa hoosta ka xariiqay baahida loo qabo "in laga fogaado tillaabooyinka kicin kara walaaca" bulshada Ukraine sidoo kale "wax u dhimaya xasilloonida maaliyadeed" ee waddanka ka haray Soviet-ka, ayaa lagu yiri bayaan Ukraine ah.

Faransiiska ayaa sheegay inuu qorsheynayo inuu boqolaal askari u diro bariga Isbaheysiga NATO ee Romania, taasoo qeyb ka ah howlgalkii ugu horeeyay ee uu sheegay Madaxweyne Emmanuel Macron horaantii bishaan.

Le Drian ayaa la filayaa in uu booqasho ku tago Ukraine 7-8-da February isaga iyo dhigiisa Jarmalka Annalena Baerbock, halka Ra'iisul Wasaaraha Poland Mateusz Morawiecki uu ku wajahan yahay Kyiv Talaadada si uu ula kulmo Madaxweynaha iyo Ra'iisul Wasaaraha.

Ra’iisul Wasaaraha Britain Boris Johnson ayaa la filayaa in uu la hadlo Madaxweynaha Ruushka Vladimir Putin ka hor inta uusan u ambabixin gobolka oo uu ku soo kordhiyo guuxa madaxda reer galbeedka oo ku boorinaya inuu ka laabto adeegsiga milatariga.

Dhanka kale, danjiraha Moscow ee Ireland ayaa sheegay in dalkiisu aanu dhoolatus ciidan ku samayn doonin biyaha caalamiga ah ee badda Ireland toddobaadka soo socda ka dib markii ay dawladda Ireland ka codsatay in hawlgalka loo raro.

Ireland ayaa la ogeysiiyay todobaadkii hore in dhoolatusku uu ka dhici doono meel 240km (149 mayl) u jirta xeebta koonfur-galbeed ee aagga dhaqaalaha ee gaarka ah laakiin aan ahayn dhul-badeedkeeda, taasoo la macno ah in lagu oggolaaday sharciga caalamiga ah.

Wasiirka arrimaha dibadda Ireland Simon Coveney ayaa sheegay in qorshayaashan aan la soo dhawaynayn, gaar ahaan xilli Maraykanka iyo xulafada kale ee reer galbeedka ay ka cabsi qabaan in Ruushku isu diyaarinayo duullaanka Ukraine ka dib markii uu soo ururiyey in ka badan 100,000 oo askari oo u dhow xuduudihiisa.

Ruushka, oo diiday inuu qorsheynayo duullaan lagu qaado deriskiisa, ayaa go'aansaday inuu u raro leyliyada badda si ay u noqoto "tilmaanta niyad-wanaagga" kooxaha kalluumeysiga ee Dublin iyo Irish, Danjire Yury Filatov ayaa ku yiri hadal uu soo saaray.

Coveney ayaa bartiisa Twitter-ka ku sheegay in uu soo dhaweynayo jawaabta.

Magaalada Washington, si kastaba ha ahaatee, Biden wuxuu sheegay inuu dhawaan u diri doono tiro yar oo ciidamo Mareykan ah si ay u xoojiyaan joogitaanka NATO ee Bariga Yurub iyadoo xiisadaha ay sii kordhayaan.

Maraykanku waxa uu hore u haystay tobanaan kun oo ciidamo ah oo fadhiisimo ka dhigtay guud ahaan Galbeedka Yurub.

Ukraine ayaa u soo jeesatay dhanka reer galbeedka tan iyo markii Moscow ay qabsatay gacanka Crimea sanadkii 2014, waxayna bilowday hurinta colaad gooni u goosad ah oo ka taagan bariga dalkaasi oo ay ku naf waayeen in ka badan 13,000 oo qof.

Marka la eego dhismihii ugu dambeeyay ee Ruushka, qaar ka mid ah xulafada reer galbeedka - oo uu hogaaminayo Mareykanka - ayaa kor u qaaday hubka la geynayo Kyiv oo loo isticmaali karo in looga hortago weerar.

GAROWE ONLINE