Ururka Jaamacadda Carabta oo soo dhaweysay go'aanka ICJ
-
- Posted On 04-02-2017, 08:58PM
Ururka Jaamacadda Carabta ayaa soo dhaweysay tallaabada Maxkamadda Cadaaladda ee ICJ ku ogolaatay inay qaado kiiska ku saabsan muranka dhanka badda ee dhexyaalla dalalka Somalia iyo Kenya.
Xoghayaha guud ee Ururka Jaamacadda Carabta Ahmed Aboul-Gheit, ayaa sheegay inuu ku faraxsanyahay tallaabada hormarka leh ee maxkamaddu horay u qaaday, isagoo xusay inay muhiim tahay sidii loo calaamadayn lahaa meelaha muranku ka jiro.
Aboul-Gheit, ayaa sidoo kale soo dhaweeyay in labada dal murankooda u maraan qaanuun caalami ah isagoo intaas ku daray inay ilaaliyaan saaxiibtinimada, walaalnimada iyo daris wanaaga ka dhaxeeya.
Isagoo sii hadlaya wuxuu muujiyay sida Ururka Jaamacadda Carabta u garab taaganyihiin dalka Somalia oo ku ammaanay hormarka iminka ay lugaha lasii galeen.
Xoghaya ayaa arrintan kaga hadlay war-saxaafadeed soo baxay maalintii Jimcaha ee lasoo dhaafay, kadib markii Khamiistii hore Maxkamadda ICJ aqbashay inay qaado dacwadda Somalia u gudbisay April 2014.
GAROWEONLINE
