Walid Muallem: Wasiirkii arrimaha dibadda Suuriya oo geeriyooday
-
WARIYAHA ARRIMAHA CAALAMKA GAROWE ONLINE
- Posted On 16-11-2020, 02:25PM
DAMASCUS, Syria – Wasiirka Arrimaha Dibadda Suuriya, Walid Muallem, ayaa geeriyooday, sidda ay Isniinta maanta ah warisay SANA, oo ah wakaalada wararka rasmiga ah ee faafisa macluumaadka dowliga ah ee waddankaas.
Warbixinta ay tabisay wakaaladda ayaa waxaanan shaaca looga qaadin sababta dhabta ah ee keentay dhimashadda mas'uulkaan.
Muallem oo ku dhintay da'da 79-sano jir ayaa wasiirka arrimaha dibadda dalkaas wuxuu ahaa tan iyo 11-kii Febraayo sanadkii 2006-dii.
Sidda ay sheegtay warbaahinta, Muallem wuxuu ahaa mid kamid ah taageereyaasha madaxweyne Bashar al-Assad ee colaadda Suuriya.
Caasimadda Suuriya ee Damascus ayuu ku dhashay 1941-dii, waxaana uu soo noqdey danjiraha Suuriya u fadhiya Mareykanka 1990 illaa iyo 1999.
Madax xil-haya, kuwa hore, siyaasiyiin caan ah iyo dadyow kale ayaa tacsi u diray qoyska uu ka geeriyooday, waxaana ay u rajeeyeen bedel wanaagsan.
Sidda ay xaqiijiyeen illo wareeydo xog ogaal ah, Faisal Mekdad oo haatan ah wasiir ku xigeenka wasaaradda arrimaha dibadda ayaa lagu waddaa in uu bedelo Walid Muallem kaasoo horey soo noqdey ra'iisul wasaare ku xigeenka.
GAROWE ONLINE
