Xi Jinping: Madaxweynaha Shiinaha oo ka dagay Sacuudiga

Booqashadii ugu dambeysay ee Xi ku tagay Sacuudi Carabiya waxay ahayd 2016.

RIYADH, Sacuudi Carabiya - Madaxweynaha Shiinaha Xi Jinping ayaa fiidnimadii Arbacada shalay ahayd waxa uu booqasho rasmi ah ku tagay boqortooyadda Sacuudi Carabiya.

Xi ayaa waxaa garoonka diyaaradaha ee King Khalid ku soo dhaweeyay Wasiirka Arrimaha Dibadda Sacuudiga Amiir Faysal Bin Farxaan iyo Guddoomiyaha Gobolka Riyaad Amiir Faysal Bin Bandar.

Madaxweynaha Shiinaha ayaa inta uu joogo Boqortooyada qaniga ku ah Saliida waxa uu ka qeyb galayaa shir madaxeedka u horeeyay ee Shiinaha iyo Carabta iyo shir madaxeedka Shiinaha iyo Khaliijka ee ka dhacaya Riyadh.

Sidoo kale waxa uu wada hadal la yeelan doonaa Boqorka Sacuudiga Boqor Salmaan Bin C/casiis. Booqashadii ugu dambeysay ee Xi ku tagay Sacuudi Carabiya waxay ahayd 2016.

Booqashada madaxweynaha Shiinaha ayaa ku soo beegantay saddex bilood ka dib markii madaxweynaha Mareykanka Joe Biden uu booqday Riyadh iyadoo ay jirto xiisad dhanka tamarta ah oo uu sababay dagaalka Ruushka ee Ukraine.

GAROWE ONLINE