Bosaso: maamulka gobolka Bari oo kormeeray saldhigyada booliska
-
- Posted On 10-06-2015, 11:07AM
June 10, 2015 (GO)- Mas'uuliyiinta ugu sarreeya maamulka cusub ee gobolka Bari ayaa maanta kormeer shaqo ku tegey saldhigyada booliska ee degmada Bosaso.
Guddoomiyaha gobolka Bari Yuusuf Maxamad Wacays (Dhedo) iyo duqa Bosaso Maxamed Siciid Shabeel oo warbaahinta la hadlay ayaa sheegay in ujeedada kormeerkani ahayd si loogu kuurgalo xaaladda ciidamada ka hawlgala saldhigyada booliska iyo weliba xaaladda nololeed ee maxaabiista.
Dhedo iyo Shabeel oo todobaad kahor xilka la wareegey ayaa ballan qaadey waxqababad ballaaran iyagoo sheegay inay wax ka qaban doonaan cabashooyinka ka imaanaya qaybaha kala duwan ee bulshada.
Waa markii ugu horreysey ee mas'uuliyiinta ugu sarreeya maamulka gobolka Bari ay kormeer ku tagaan qaar kamid ah xarumaha dowladda ee degmada Bosaso.
GAROWE ONLINE
