Burtinle: Madaxweyne Gaas oo la kulmay Islaan Bashiir
-
- Posted On 31-07-2015, 02:19PM
July 31, 2015 (GO)- Madaxweynaha Puntland Cabdiweli Maxamed Cali Gaas iyo wefdi balaaran oo uu hogaaminayo ayaa maanta si weyn loogu soo dhaweeyey degmada Burtinle ee gobolka Nugaal.
Soo dhoweynta waxaa ka qayb qaatay mas'uuliyiinta ugu sarreysa maamulka Burtinle, isimmo iyo dadweyne boqollaaal tiradoodu gaareysey, kuwaas oo ruxayey caleemo qoyan.
Madaxweynaha ayaa goob fagaare ah kula hadlay dadweynaha, wuxuuna uga mahadceliyey sida wanaagsan ee ay usoo dhoweeyeen.
"Runtii sida aadka u wanaagsan ee aad noo soo dhaweyseen aniga iyo wefdigayga aad ayaan idiinka mahadcelin , waxaa iiga muuqata soo dhaweynta dad faraxsan , waxaa sidookale ii muuqda magaalo qurux badan oo hurumartay" ayuu yiri.
Ugu dambeyn waxaa wafdiga loo gudbiyey hoyga uu degmada Burtinle ka dagan yahay Islaan Bashiir Islaan Cabdulle , waxaana halkaas madaxweynaha si wanaagsan ugu soo dhaweeyey Islaan Bashiir oo u sameeyey qado sharaf.
Ila-wareedyo lagu kalsoon yahay ayaa Garowe Online u xaqiijiyey in Madaxweynaha iyo Islaanku ka wada hadleen xaaladda gobolka Mudug iyo weliba muranka dhanka xadka ee ka dhex aloosan Puntland iyo maamulka dhowaanta Cadaado lagu dhisay ee Galmudug.
GAROWE ONLINE
