Caruur aan qaan-gaarin oo coddeysay doorashadii Puntland
-
WARIYAHA GAROWE GAROWE ONLINE
- Posted On 31-10-2021, 01:01PM
GAROWE, Puntland - Warsidaha Garowe Online ayaa wuxuu helay muuqaal muujinaya caruur aan qaan-gaarin oo ka codeynaya degmada Ufeyn Maalintii doorashadda Gollaha degaanka Oct 25-teeda.
Muuqaalkan ayaa imaanaya xili afar Urur Siyaasadeed oo ka qeybgalay doorashadda ay qaadaceen natiijadda TPEC ay ku dhawaaqdey, iyagoo sheegay in "si hufan aysan u dhicin codeynta".
Sidoo kale, muqaalkaan ayaa waxaa sidoo kale ka muuqda in aysan qarsooneyn goobta ay ka qabsoontay cod-bixinta iyo in qaar kamid ah cod-bixiyeyaasha aysan aqoon nidaamka oo loo tilmaamayo.
Urur siyaasadeedyadda Horseed, Runcad, Mustaqbal iyo Ifiye ayaa ku dhawaaway in ay sameysteen is-baheysi siyaasadeed, sida ku xusan war-saxaafadeed ay soo saareen.
Doorashaddii ka dhacdey Qardho, Ufeyn iyo Eyl ayay xuseen in mabda' ahaan ay soo dhaweynayaan balse waxay tibaxeen in ay jirtay "musuqmaasuq, cagajugleyn iyo kaarar si jumlo ah loo bixiyey".
Sida laga soo xigtey qoraalka, Guddiga Doorshadda KMG ee TPEC ayaa "baalmaray hirgalinta shuruucda doorashada loo dajiyay, sida ogaanshaha ilaha dakhliga ururrada, xakameyn la’aanta laaluushka xiliga doorashadda iyo jabinta Xeerka Diiwaangalinta Codbixiyaha".
Beesha Caalamka ayay cod dheer ugu baaqeen in ay baaritaan ku sameyso cabashooyinka ay ka muujiyeen doorashooyinka ayaga oo cambaareeyay ansixinta TPEC ee natiijadda coddeyntii dhacdey.
Ugu dambeyntii, madasha ayaa walwal ka muujisay "sii socoshada iyo mustaqbalka hannaanka axsaabta badan ee Puntland maadaama ay ku bilaabatay wadiiqo qaldan iyo nidaam sharci darro ah".
GAROWE ONLINE
