Ciidamada taraafikada Puntland oo loo qaybiyey mootooyin
-
- Posted On 09-06-2015, 08:59AM
June 9, 2015 (GO)- Sagaal mooto ayaa maanta lagu wareejiyey laanta nabadgelyada waddooyinka ee booliska Puntland (taraafikada).
Mootooyinkan oo ah kuwo casri ah islamarkaana qalabkoodu u dhameystiran yahay waxaa ku deeqday hay'adda Qaramada Midoobey u qaabilsan horumarinta ee UNDP.
Munaasabaddii qalabkan lagu wareejinayey oo ka dhacday xarunta taliska booliska ee Garowe, waxaa kasoo qayb galay saraakiil ka tirsan ciidamada booliska oo ay kamid yihiin: taliyaha guud ee booliska Puntland iyo taliyaha qaybta booliska gobolka Nugaal.
Taliyaha booliska Puntland Maxamed Siciid Jaqanaf ayaa sheegay in mootooyinkan loogu talo galay in lagu ilaaliyo shuruucda waddo marista islamarkaana lagula socdo dhaq dhaqaaqa gaadiidka.
GAROWE ONLINE
