Dr Cumar Maxamuud: Cabtooy dhakhtar ku dhaawacay Garowe

Falalka amni darro ayaa kusoo badanaya caasimada Puntland xilli laamaha amniga ku milmeen siyaasadda.

GAROWE, Puntland - Magaalada Garowe ee caasimada dowladda Puntland ayaa kooxo cabtooy ah ku dhaawaceen mid kamid ah dhalinyarada baranayay cilmiga caafimaadka ee dhowaan kasoo laabtey colaada ka oogan dalka Suudaan.

Dr Cumar Maxamuud Xasan oo kamid ah ardaydii horey uga qalinjabisay dugsiga sare ee Alwaaxa Garowe ayaa isaga oo kasoo baxay salaadii subax waxaa dhaawacay koox cabtooy ah.

Qof kamid ah qaraabada dhibanaha ayaa u sheegay Garowe Online: "Isaga iyo walaalkiis ka yar oo kasoo baxay salaadii subax ayaa waxaa ka hor yimid koox cabtooy ah waxayna ku dhufteen xabad kaga dhacday bawdada iyaga oo taleefanadii ka qaatay".

Wararka ayaa intaas ku daraya in kooxda cabtooyda ah ay sidoo kale tageen jidka sodonka ee Garowe isla markaana ay halkaasi taleefanadii kaga wada qaadeen odayaal socod jimicsi ah ku samaynayay.

Kooxahaan cabtooyda ah ayaa faro kulul ku haya Garowe iyada oo Booliska Puntland ay ku mashquulsan yihiin ilaalinta sanaadiiqda doorashada lagu muran-san yahay ee golayaasha deegaanka Puntland.

Doorashada lagu muran-san yahay ayay ku baaqeen in la joojiyo siyaasiyiin ku shirsanaa Garowe labadii Bari ee lasoo dhaafay iyaga oo ku waaniyey taliyaha Booliska Puntland in uu shaqadiisa aqoonsado kana dhex-baxo khilaafka siyaasiga ah.

GAROWE ONLINE