FAO oo laba jibaareysa mashaariicda ay ka fuliso Puntland

Madaxwayne Deni ayaa maanta wuxuu xafiiskiisa ku qaabilay Wakiilka Hay’adda FAO ee Soomaaliya.

GAROWE, Puntland - Madaxweyne Siciid Cabdullaahi Deni ayaa Qasriga Madaxtooyada ee Garoowe ku qaabilay Wakiilka Hay’adda FAO ee Soomaaliya Etienne Peterschmitt iyo wafdi uu hoggaaminayo.

Kulanka ayaa looga hadlay mashaariicda hay’adda FAO ka wado Puntland iyo sidii loo sii laba jibaari lahaa gaar ahaan mashaariicda la xiriira Beeraha iyo Xoolaha.

Madaxtooyada Puntland ayaa tiri: "Waxaa Kala qeyb galay Madaxweynaha Kulankan Wasiiru Dowlaha Wasaaradda Deegaanka, Beeraha iyo Isbedelka Cimilada iyo Agaasimaha Guud ee Madaxtooyada Puntland".

Dhanka kale, madaxwayne Deni ayaa yiri "Waxaan qaabilnay oo maanta booqasho noogu yimi Wakiilka Hay’adda FAO ee Soomaaliya Etienne Peterschmitt iyo wafdi uu hoggaaminayo".

"Waxaan ka wada hadalnay sidii loo sii laba jibaari lahaa Mashaariicda ay ka wadaan Puntland gaar ahaan mashaariicda la xiriira Beeraha iyo Xoolaha oo muhim u ah nolosha asaasiga ah ee dadka reer Puntland iyo guud ahaan Soomaaliya," ayuu raaciyey.

GAROWE ONLINE