Gaas oo furay wejiga labaad ee tirakoobka shaqaalaha Puntland
-
- Posted On 06-06-2015, 10:33AM
June 6, 2015 (GO)- Madaxweynaha Puntland Cabdiweli Maxamed Cali Gaas ayaa maanta magaalada Garowe uga qayb galay munaasabad lagu soo xirayey wajiga koowaad ee barnaamijka tirakoobka iyo diiwaangelinta shaqaalaha dawladda islamarkaana lagu daah furayey wejiga labaad ee barnaamijkaas.
Xafladda oo ka dhacday hoolka shiraraka ee PDRC ayaa waxaa ka soo qeyb-galay Waasiiro, xildhibaano, agaasimeyaal, saraakiil ka tirsan madaxtooyada iyo xubno metelayey qaybaha kala duwan ee bulshada.
Gudiga farsamada iyo dib-uhabaynta shaqaalaha Puntland ayaa madasha ku soo bandhigay natiijada rasmiga ah ee ka soo baxday wajiga koowaad ee shaqada guddiga.
Gaas oo goobta ka hadlay ayaa sheegay in hirgelinta tirakoobka iyo diiwaangelinta shaqaalaha dawladda Puntland uu qeyb ka ahaa balanqaadyadii uu sameeyey.
Madaxweynuhu wuxuu sidoo kale u mahadceliyey gudigii howshaas loo xil saarey oo sida uu sheegay si wanaagsan u gutey waajibaadkii shaqo ee la faray.
"waa muhiim in la helo tirada saxda ah ee shaqaalaha dawladda lagana warhayo habka ay u shaqeeyaan , hadana waxaa noo soo dhammaaday wajigii koowaad ee ahaa in tirada saxda ah ee shaqaalaha dawladda la helo" ayuu yiri.
Madaxweyne Gaas ayaa ugu dambeyntii sheegay in dhawaan la soo dhisi doono hay'adda tababarka shaqaalaha, taasoo ka caawin doonta shaqaalaha dowladda inaysan hadda kadib dibaddda tababar u aadin.
GAROWE ONLINE
