Garowe: kal-fadhiga baarlammaanka Puntland oo habsami u socda
-
- Posted On 24-06-2015, 10:17AM
June 24, 2015 (GO)- Kal-fadhiga 35aad ee Golaha Wakiillada Puntland ayaa si habsami leh uga socda xarunta baarlammaanka ee magaalada Garowe.
Xildhibaannada baarlammaanka oo maanta isugu yimid fadhigoodii siddeedaad ayaa soo gaba gabeeyey dhegeysiga warbixinaha guddi-hoosaadyada golaha.
Guddiyada ayaa faah faahin ka bixiyey shaqooyinkii ay qabteen muddadii u dhexeysey kal-fadhiyada 34aad iyo 35aad, waxaana maanta golaha warbixin siiyey Guddiga Arrimaha Bulshada.
Guddoomiyaha Baarlammaanka Siciid Xasan Shire ayaa sheegay in wixii berri loo gaaro uu baarlammaanku u guda geli doono ajandeyaasha kale ee dhiman.
Qodobada kal-fadhigan diiradda lagu saari doono oo tiradoodu gaareyso lix iyo toban, waxaa ugu muhiimsan: xisbaab-xirka miisaaniyaddii 2014, amniga, dhaqaalaha iyo; dastuurka iyo arrimaha federaalka.
GAROWE ONLINE
