Garowe: wasiirkii hore ee Waxbarashada Puntland oo xilka wareejiyey
-
- Posted On 23-06-2015, 11:33AM
June 23, 2015 (GO)- Wasiirkii hore ee Wasaaradda Waxbarashada Puntland Cali Xaaji Warsame ayaa maanta si rasmi ah xilka u wareejiyey.
Munaasabadda xil wareejinta ayaa ka dhacday xarunta Wasaaradda ee Garowe, waxaana xilka si kumeel gaar ah ula wareegey wasiir ku xigeenka waxbarashada Maxamed Cali Faarax, maadama wasiirka cusub ee dhowaan xilkaas loo soo magacaabay weli dalka soo gaarin.
Cali Xaaji Warsame ayaa si kooban uga warbixiyey waxyaabihii u qabsoomay muddadii uu wasiirka ahaa, isagoo xusay inay ugu muhiimsan yihiin: dib u eegista hannaanka shaqo ee Wasaaradda, manhajka waxbarashada, xoojinta tababarrada macalimiinta iyo baahinta shaqooyinka Waasaradda.
Wasiir ku xigeenka waxbarashada DR.Maxamed Cali Faarax oo xilka si kumeel gaar ah ula wareegay ayaa dhankiisa sheegay in Cali Xaaji wax la taaban karo wasaradda kusoo kordhiyay.
Cali Xaaji ayaa kamid ahaa sagaal wasiir oo xilalkooda waayey kadib isku-shaandheyn Madaxweynaha Puntland Cabdiweli Maxamed Cali Gaas uu ku sameeyey golihiisa wasiirrada.
Inta badan wasiirrada cusub ayaa xilalkooda la wareegey, waxaase weli dhiman Wasiirkii Caafimaadka oo la sugayo in uu maalmaha soo socda Garowe soo gaaro.
GAROWE ONLINE
