Guddiga xulista xubnaha golaha deegaanaka Bosaso oo la shaaciyay [Dhagayso]
-
- Posted On 07-09-2015, 09:07AM
07 September, 2015(GO)-Wasaaradda arrimaha gudaha Puntland ayaa magacowday guddiga soo xulista iyo ansixinta golaha deegaanka degmada Bosaso ee xarunta gobolka Bari.
Guddigaan ayaa sida ku xusan war qoraal ah oo ka soo baxay wasaaradda arrimaha gudaha Puntland waxay ka koobanyihiin 7-ruux kuwaas oo isugu jira wasiiro, gudoomiyaha gobolka Barri, gudoomiyaha ururka haweenka Puntland, la taliye ka tirsan wasaaradda arrimaha gudaha iyo isu-duwaha wasaaradda ee gobolka Bari.
Xubnahan la magacaabay ayaa waxaa gudoomiye looga dhigay wasiirka wasaaradda arrimaha gudaha Puntland Axmed Cilmi Cismaan "Karaash" halka ku xigeena looga dhigay wasiirka amniga Puntland Cabdi Xirsi Cali "Qarjab" waxayna xilalkan horey ugu magacownaayeen gudigii soo xulay golaha deegaanka degmada Garowe.
Odayaasha iyo nabadoonnada gobolka Bari ayaa lagu amray inay 3-cisho ku soo gudbiyaan xubintii u matali lahayd golaha deegaanka, isla markaana reerkii leh 3-xubnood mid ka mid ahi uu noqdo haween.
Degmada Bosaso malahayn muddo dhawr bilood ah gole deegaan, waxaan si kumeel gaar ah xilka degmada u sii hayay Maxamed Siciid Shabeelo oo dhawaan soo magacaabey madaxweyne Gaas maadaama uu kala direy xubnihii hore.
GAROWEONLINE
