Gudoomiyihii maxkamada sare Puntland oo ku dhintay Turkiga
-
WARIYAHA ANKARA GAROWE ONLINE
- Posted On 23-06-2019, 07:14PM
ANKARA, Turkey – Alle ha u naxariistee waxaa magaaladda Ankara ee caasimadda dalka Turkiga ku geeriyoodey gudoomiyihii maxkamada sare ee dowladda Puntland.
Yuusuf Xaaji Nuur oo xanuunsanaa mudooyinkii dambe ayaa waddankaasi loo geeyay xaalado la xiriira caafimaad, sidda ay xubno kamid ah qoyskiisa u xaqiijiyeen Garowe Online.
Dr Nuur oo markii ugu dambeysay xilkan u magacaabey madaxweyn Cabdiweli Maxamed Cali [Gaas] bishii Agoosto 2016-kii ayaa xafiiska joogey muddo saddex sano ah.
Marxuumka ayaa lagu wadaa in aas qaran oo madax kala duwan ay ka qeybgasho loo sameeyo.
Marxuumku oo dowlada Soomaaliya kasoo qabtay xilal kala duwan ayaa ahaa masuulkii ugu horeeyey ee loo magacaabo Guddoomiyaha Maxkamadda Sare ee Puntland.
Sidoo kale waxa uu qayb ka ahaa bud-dhigayaashii Puntland, isagoona qabtay xilal kale oo muhiim ah, kuwaasi oo uu ugu qareemay horumarka dalkiisa iyo dadkiisa Soomaaliyeed.
GAROWE ONLINE
