Hawlgal dad badan lagu soo qabqabtey oo Bosaso laga sameeyey
-
- Posted On 12-05-2015, 01:39PM
May 12, 2015 (GO)- Ciidamada booliska ayaa hawgal dad badan lagu soo qabqabtey 24tii saac ee ugu dambeeyey ka sameeyey magaalada Bosaso ee xarunta gobolka Bari.
Ciidamada hawlgalkan sameeyey oo ka tirsan Birmad-Boolis shalay ayey Bosaso yimaadeen iyagoo kasoo ruuqaansadey degmada Qardho, isla xalayna waxay bilaabeen hawgal lagu baarayo gaadiidka iyo qaybo kamid ah xaafadaha.
Ku dhowaad saddex boqol oo qof oo dhallinyaro u badan ayey boolisku gacanta ku dhigeen, waxaana laysugu keenay saldhigga dhexe ee booliska.
Taliyaha booliska Puntland Maxamed Siciid Jaqanaf oo la hadlay VOA ayaa sheegay in badi dadkii hawgalka lagu soo qabtey lasii daayey, balse weli baaritaan lagu wado dhowr qof oo loo malaynayo inay ka tirsan yihiin Al-shabaab.
Hawlgalkan ayaa kusoo aadaya xilli aammaanka magaalada Bosaso uu todobaadyadii u dambeeyey soo xumaanayey.
GAROWE ONLINE
