Koor: "yaan lagu xadgudbin xasaanadda goleyaasha deegaanka"
-
- Posted On 08-06-2015, 10:58AM
June 8, 2015 (GO)- Duqii hore ee degmada Garowe Cabdicasiis Cilmi Koor ayaa ugu baaqay dowladda inay ilaaliso xasaanadda goleyaasha deegaanka islamarkaana qaab sharci ah loosoo maro kala dirista goleyaasha deegaanka.
Koor oo ka hadlayey munaasabad xil-wareejin ahayd oo maanta ka dhacday Garowe ayaa tilmaamay in dhanka xuquuqda ay ka siman yihiin golaha wakiillada Puntland iyo goleyaasha deegaanka, sidaas darteedna ay mudan yihiin in la ixtiraamo.
"goleyaasha deegaanku xasaanad bay leeyihiin, waxayna la xasaanad yihiin yihiin baarlammaanka...dhinaca xuquuqda, dhinaca jiritaanka iyo dhinaca kala diristaba" ayuu yiri.
Dhanka kale, duqii hore ee Garowe ayaa si kooban uga warbixiyey waxyaabihii u qabsoomay muddadii uu xilka hayey, isago xusay in lagu xasuusan doono waxqabad muuqda oo dhinacyo badan leh.
Munaasabad xil-wareejin ahayd oo maanta ka dhacday hoolka shirarka ee hay'adda PDRC, ayaa waxaa xilka kula wareegey duqa cusub ee dhowaan Madaxweyne Gaas usoo magacaabay magaalada Garowe, Axmed Siciid Geelle (Shoodhe).
GAROWE ONLINE
