Labo kamid ah hay’adaha Sirdoonka Puntland oo la mideeyay
-
WARIYAHA GAROWE ONLINE Garoowe
- Posted On 28-06-2018, 06:19PM
GAROOWE, Puntland- Golaha xukuumadda Puntland ayaa cod buuxa ku mideeyay hay’adihii Sirdoonka ee PIA-da iyo PSS-ta oo dhawaan Madaxweyne Gaas xilalkii ka qaaday Agaasimayaashoodii.
Shirka golaha wasiirrada Puntland, waxaa lagu sheegay in si loo helo hay’ad nabad sugid oo howlaha amniga si buuxda uga shaqaysa la mideeyay labadaas hay’adood loona bixiyay PISA.
“Golaha xukuumada Dowladda Puntland oo tixraacaya dastuurka dalka iyo baahida loo qabo hay'add Amni oo si buuxda u shaqeysa ayaa dood dheer ka yeeshay magaca iyo mideynta hay'addaha Amaanka dalka, waxayna golahu cod buuxa ku meel mariyeen mideynta hay'addaha PIA & PSS,isla markaan loo bixiyey Magac cusub oo ah hay'adda nabad-sugida iyo Amniga Puntland (Puntland intelligence and security agency (PISA).” Ayaa lagu yiri war-saxaafadeed kasoo baxay shirka Khamiislaha ah ee golaha xukuumadda Puntland.
Kulankan ayaa sidoo kale looga hadlay amniga Puntland, waxaana wasaaradda Amnigu sheegtay inuu yahayd mid aad u wanaagsan iyadoo lagu ammaanay ciidamada qalabka sida difaaca ay ku jiraan.
Kulanka ayaa sidoo kale goluhu kaga hadlay xeerka Taya-dhowrka Khayraadka badda iyadoo wasaaradda Kalluumaysigu qaybsisay xeerkaas.
“Golaha xukuumada Dowladda Puntland ayaa warbixin kooban ka dhageystay Wasaaradda Kaluumeysiga iyo Kheyraadka Badda oo u qeybisay golaha xeerka tayo-dhowrka kheyraadka Badda, xeerkaan oo qeexaya baarista, tayada, hubinta iyo cadeynta guud ahaan kaluunka ayaa lagu meel marin doonaa kulanka xiga ee golaha xukuumadda,” ayaa lagu yiri war-saxaafadeedka golaha xukuumadda Puntland.
GAROWE ONLINE
