Maamul cusub oo loo dhisay degmada Jarriiban [DHEGEYSO]
-
- Posted On 11-07-2015, 05:22PM
July 11, 2014 (GO)- Guddoomiyaha Cusub ee degmada Jariiban Maxamed Yuusuf Shire oo la hadlayay Radio Garowe ayaa sheegay inuu wax ka qaban doono khilaafka soo noq noqdey ee ka dhasha maamulka degmada.
KHilaaf kasta oo yimaada wuxuu sheegay in lagu dhamayn doono wada-tashi ballaran oo dhamaman qaybaha bulshadu ka qayb geli doonaan.
Dhanka kale, Maxamed Yuusuf ayaa xusay in waxa ugu horreeya ee uu qabanayo yahay isku-xirka bulshada iyo xoojinta nabadgalyada.
Ugu dambeyntii wuxuu tilmaamay in dhowaan cashuur ururin laga bilaabi doono 53 tuulo oo degmada hoos yimaada si loo hir geliyo adeegyada caafimaadka, waxbarashada iyo biyaha.
Maxamed Yuusuf Shire ayaa kusoo baxay cod aqlabiyad leh kadib doorasho labo maalmood kahor ka dhacday degmada Jariiban.
Madaxweynaha Punltand Cabdiweli Maxamed Cali Gaas ayaa ayaa muddadii sanad iyo barka ahayd ee uu xilka hayey wuxuu kala direy goleyaal deegaan oo toban kor u dhaafaya.
Magaalooyinka maamulladii horey uga jirey lakala direy waxaa kamid ah: Garowe, Bosaso, Galkacayo, Jariiban, Isku-shuban, Qandala, Dhahar iyo Baargaal.
Waxaa xusid mudan in badi guddoomiyeyaasha cusub ee degmooyinku yihiin kuwo xulafo dhow la ah Madaxweyne Gaas.
GAROWE ONLINE
