Madaxweynaha Puntland oo la kulmey Godoonka Barlamaanka
-
- Posted On 17-05-2015, 11:34AM
May 17, 2015 (GO)- Maalmo kaddib markii qaar kamid ah xildhibaannada Barlammaanka Puntland soo gudbiyeen qoraal ay ku dalbanayaan kal-fadhi deg deg ah si looga arrinsado xaalado taagan oo ay ku tilmaameen kuwo xasaasi ah, ayaa maanta waxaa Garowe ku kulmey Madaxweyne Cabdiweli Maxamed Cali Gaas iyo Gudoonka Barlamanka Puntland.
Mas'uuliyiintaan oo wada qaatey kulan quraac ahaa ayaa si qoto dheer isula gorfeeyey dalabka xildhibaannada, sababta xilligan kusoo beegtay iyo weliba suuragalnimada in kal-fadhi deg deg ah la qabto maadaama ay muddo koobani ka dhiman tahay waqtiga uu furmayo kal-fadhiga 35aad ee Golaha Wakiillada Puntland.
Kulankaan ayaa sidoo kale lagu wada hadalsiiyey Gudoomiye ku-xigeenka labaad ee Barlamanka iyo madaxweyne ku-xigeenka kadib markii muddo isku khilaafsanayeen xubinta buuxineysa halkii ay baneysay xildhibaan Saado Cali.
Madaxweyne Gaas ayaa sidoo kale galabta kulan la qaadan doona xildhibaannada dalbanaya kal-fadhiga deg deg ah, wuxuuna kala hadli doonaa arrimo badan.
GAROWE ONLINE
