​Miino lagu weeraray saldhig ku yaal Galkacyo

GALKACYO, Puntland- Koox hubaysan ayaa caawa fiidkii weerar loo adeegsaday miinada Gacanta laga tuuro ku qaaday saldhig lagu magacaabo Miir oo ku yaalla Galbeedka magaalada Galkacyo gaar ahaan dhinaca Puntland.

Weerarka oo ay soo qaadeen mallayshiyaad aan haybtooda la aqoonsan ayaa wararku sheegayaan inuusan dhalin wax khasaaro ah, waxaana qaraxa Bam gacmbeedka  la tuuray xigay rasaas muddo kooban socotay.

Saraakiil katirsan ciidamada Saldhigaas ku sugnaa ayaa GO u sheegay inaysan jirin wax khasaaro ah oo dhinacooda soo gaaray, iyagoo falkaas ku eedeeyay dhinaca Galmudug.

Majirto wax war ah oo kasoo baxay dhinaca Galmudug.

Arrintan ayaa timid iyadoo waan waan nabadeed ay socota magaalada Galkacyo kaasoo lagu hishiisiinayo dhinacyada is haya ee Puntland iyo Galmudug.

Waxaa socda dadaalo lagu dhaqan galinayo xabad joojin dhexmarta labada dhinac inta laga gaarayo hishiis rasmi ah.

Madaxda labada maamul ayaa ku sugan degmada Galkacyo, waxaana jira kulamo dhexmaray tan iyo maalintii Sabtida ee lasoo dhaafay.

Labadii bilood ee u dambaysay magaalada Galkacyo xarunta gobolka Mudug, ayaa hoy u noqtay dagaallo u dhaxeeya ciidamada labada maamulka ee degmadaas ka taliya.

GAROWEONLINE