Puntland: Degmada Qandala oo xasiloon
-
- Posted On 03-11-2016, 01:02PM
BOSASO, Puntland- Xaaladda magaalada Qandala ee gobolka Bari, ayaa maanta dagan kadib duqaymo dhinaca badda ka imaanayay oo ilaa shalay la maqlayay halkaas.
Waxaa gabi ahaanba Qandala isaga qaxay dadkii ku noolaa iyagoo soo gaaray magaalada Bosaso iyo tuulooyin ku teedsan xeebta.
Maamulka gobolka Bari, ayaa kulamo kala duwan la qaatay bulshada iyo hay'adaha deeqaha bixiya, waxaana la sheegay inay kala hadleen sidii muwaacino loo soo gaarsiin lahaa dadka kusoo barakacay dagaal laga cabsi qabo inuu Qandala ka qarxo.
Qaar kamid ah bulshada soo barakacday, ayaa warbaahinta u sheegay in xaaladoodu liidato islamarkaana aysan jirin cid kaalmo soo gaarsiisay, hadii ay ahaan lahayd dhinaca dowladda iyo hay'adaha caalamiga ah.
Madaxweyne Gaas, oo shalay Bosaso ka hadlayay, wuxuu sheegay inay dowladdu caawin doonto dadka waxyeelladu kasoo gaarto howlgalka ka dhanka ah kooxda sheegatay Daacish ee ku sugan Qandala.
Wararku, waxay intaas ku darayaan in ciidamada difaaca Puntland kusii siqayaan magaalada Qandala oo ay ku suganyihiin koox 50 qof lagu qiyaasay oo Daacish xiriir la leh.
Dhinca badda, waxaa sidoo kale ku sugan maraakiib Ajnabi ah oo ilaa shalay qantaalo kusoo ridayay Qandala.
Lama oga khasaaro howlgalkaas ka dhashay, waxaana gabi ahaanba haawanaysa degmadaas qadiimiga ah.
Waa markii ugu horaysa koox sheegata Daacish ay ku sugnaadaa degmo kamid ah Somalia.
GAROWEONLINE
