Puntland: Maxaa xulista Aqalka Hoose loogu asteeyay xero ciidan?

GAROWE, Puntland - Guddiga maamulaya kuraasta Golaha Shacabka ee degaan doorashadoodu tahay Puntland ayaa sababeeyay in xulista kuraastii ugu horeysay ee Aqalka Hoose loogu qabtey Xeradda ciidamadda 54aad.

Cabdikariin Muuse Maxamed, guddoomiyaha guddiga SEIT-Puntland oo war-fidiyeenka la hadlay kadib doorashadda shantaas kursi, ayaa talaabadan wuxuu u cuskadey "sababo dhanka ammaanka ah".

"Doorashadda waxaa lagu qabtey hoolkii lagu aas-aasay Puntland 1998. Waa hool caan ah oo ummadda ugu yaala in ay ku qabsato danaheeda," ayuu yiri guddoomiye Maxamed oo ka jawaabaya guux ka yimid dadweynaha.

Wuxuu hadalkiisa intaas kusii daray: "Maadaama dowladda u xilsaarneyd in ay keento goob dowladeed, amni darteeda ayaa keentay in halkan lagu qabto doorashadda, wax kale oo ku jira ma jiraan".

"Jaamacadihii arday baa ku jirta. Hoteeladii private-ka ahaa ma qaadi kari lahayn dadka halkan imaadey. Magaaladana in mashquul laga abuuro looma baahneyn wax aan ka ahayn in loo arkay meel u haboon ma jirto," ayuu xusay.

Hase ahaatee, illaa haatan, ma jiro taliye ciidan oo fagaare ka sheegay sababta amni ee guddiga doorashadda ka dhawaajiyey. Maxamed wuxuu ku adkeysatay in ay u banaan daadidhinta geedi-socodkan.

Dhawaqa guddoomiye Cabdikariin Muuse ayaa kusoo beegmaya xilli saacadihii lasoo dhaafay ay baraha bulshadda hareeyeen hadalo qaarkood ka imaanayey siyaasiyiin kuwaasoo durayay in doorashada lagu qabto xero ciidan.

GAROWE ONLINE