Puntland oo cambaareysay weerarkii SL ee kolanyada Wasiirka Tacliinta
-
WARIYAHA GAROWE GAROWE ONLINE
- Posted On 23-05-2019, 04:45PM
GAROWE, Puntland - Madaxweyne ku xigeenka dowladda Puntland, Axmed Cilmi Cismaan Karaash ayaa gudoomiyey kulanka todobaadlaha ee Golaha Xukuumada.
Shirka ayaa waxaa isbuucaan diirada lagu saarey Imtixaanaadka Shahaadiga ah, Duulaanka Soomaliland ee gobolka Sanaag, Saameynta Abaarta, iyo Warbixino Kale.
Ugu horeyn, wasaarada Tacliinta ayaa sheegtay in Imtixaanka uu si nabad ah ku bilowda kuna soo idlaaday xili wasiirada ay natiijo wanaagsan u rajeeyeen ardayda.
Laamaha amaanka iyo wasiiradii socdaalka ku tegay gobolka Snaaag ayaa warbixin u gudbiyey Golaha oo ku aadan duulaankii todobaadkaan ee ciidamada maamulka Somaliland.
Xukuumada oo si adag u cambaareysay falkaasi ayaa ku tilmaamtay mid ujeedkiisu ahaa khalkhal gelinta Imtixaanaadka, waxayna shacabka uga mahad-naqday garab istaagooda wafdiga.
Weerarka maamulka Hargeysa oo ka dhacay tuulada Damala Xagarre kaasi oo dhicisoobay ayaa lagu beegsaday kolanyo uu la socday wasiirka Waxbarashada Puntland.
Wasaaradda Arrimaha Bulshada ayaa la faray in ay dadka degaanka gaarsiiso adeegyadda ay dowladdu uga baahan yihiin sida caafimaadka iyo waxbarashadda.
Guddiga Abaaraha ee Lanata Fulinta oo warbixin keenay fadhiga ayaa sheegay in ay jiraan degaano badan oo roobku ku yar-yahay, waxaana dadweynaha loogu baaqay in ay taakuleynta kusoo biiraan.
Ugu dambeyntii, waxaa warbixino ku saabsan howlaha u qabsoomay laga dhageystay wasaaradaha arrimaha bulshadda, dhalinyarada iyo cayaaraha, Cadaalada iyo Shaqada iyo Shaqqaalaha.
WAR-SAXAAFADEEDKA
GAROWE ONLINE
